Հոկտեմբերի 16-ին ՀՀ կառավարության կողմից կազմակերպված Թել Ավիվ – Երևան հատուկ չվերթով Իսրայելից Հայաստան է տեղափոխվել թվով 149 ՀՀ քաղաքացի և ազգությամբ հայ, հայտնում է ՀՀ ԱԳՆ-ն:
Նշվում է,որ նախնական տվյալներով մեկնելու ցանկություն հայտնել էր 190 անձ, իսկ չվերթին ներկայացել և մեկնել է 149-ը:
Ավելի վաղ հայտնել էինք, որ Հայաստանի կառավարությունը Թել Ավիվ-Երևան հատուկ չվերթ է կազմակերպել ՀՀ քաղաքացիներին և նրանց ընտանիքների անդամներին տեղափոխելու համար:
Իսրայելում ՀՀ դեսպանությունը կոչ էր արել իր քաղաքացիներին զերծ մնալ երկրի հարավային շրջաններ այցելություններից։ Դիվանագիտական առաքելությունը նաև կոչ էր արել Հայաստանի քաղաքացիներին, ովքեր արդեն գտնվում են Իսրայելի հարավում, անհապաղ տեղափոխվել ավելի ապահով տարածքներ։
Հոկտեմբերի 7-ի առավոտյան պաղեստինյան իսլամիստական ՀԱՄԱՍ շարժումը հայտարարել էր Իսրայելի դեմ «Ալ-Աքսա ջրհեղեղ» ռազմական գործողության մեկնարկի մասին։ Իսրայելի հարավն ու կենտրոնը Գազայի հատվածից տասնյակ հրթիռներով գնդակոծվել էին։ Իսրայելական բանակն ի պատասխան հայտարարել էր Գազայի հատվածում «Երկաթե սրեր» հակաահաբեկչական գործողության մեկնարկի մասին։ Իսրայելական կործանիչները հարձակվել էին ՀԱՄԱՍ-ի վրա։ Հակամարտության սրման հետևանքով երկու կողմերում էլ կան զոհեր և վիրավորներ, որոնց թիվը ժամ առ ժամ փոխվում է։