Юлдарҙа хәлдәр нисек?

Бөгөн Башҡортостан Башлығы Радий Хәбиров Хөкүмәт йортонда төбәктә юл хәрәкәте хәүефһеҙлеге буйынса ведомство-ара комиссия ултырышын үткәрҙе. Көн тәртибенә тораҡ пункттарҙа, шулай уҡ федераль, муниципаль-ара һәм урындағы автомобиль юлдарында авариялар һанын кәметеү мәсьәләләре сығарылды. "Республикала авариялар һаны аҙыраҡ булһын өсөн юл хәрәкәте хәүефһеҙлегенә етди иғтибар бүләбеҙ. Был күп яҡлы эш, ул беҙҙең автомобиль юлдарының торошона һәм юл хәрәкәтендә ҡатнашыусылар дисциплинаһына ҡағыла", - тине Радий Хәбиров. Башҡортостан Эске эштәр министрлығының ЮХХДИ бүлеге начальнигы Владимир Севастьянов әйтеүенсә, 2023 йылдың туғыҙ айында юл-транспорт ваҡиғаларында һәләк булыусылар һаны 8,7 процентҡа, ә зыян күреүселәр һаны уҙған йылдың ошо уҡ осоро менән сағыштырғанда 0,1 процентҡа кәмегән. Был осорҙа юлдарҙа барлығы 2,6 мең авария теркәлгән, уларҙа 272 кеше һәләк булған, 3110 кеше яраланған. Юл-транспорт ваҡиғаларының төп сәбәптәре булып транспорт сараларының бәрелеше һәм йәйәүлеләрҙе бәрҙереү тора. Шул уҡ ваҡытта иҫерек водителдәр тарафынан яһалған 266 авария теркәлгән. Владимир Севастьянов шулай уҡ бәлиғ булмағандар ҡатнашлығындағы авариялар һаны артыуына, пассажир транспортының төҙөк булмауы сәбәпле барлыҡҡа килгән авариялар һаны артыуына иғтибар итте. Ултырышта ҡатнашыусылар авария кимәлен тағы ла кәметеү буйынса сараларҙы барланы. Башҡортостандың транспорт һәм юл объекттары министры Александр Клебанов, «Приуралье» юлдар департаменты етәксеһе урынбаҫары Денис Абрамов, шулай уҡ Өфө хакимиәте башлығы Ратмир Мәүлиев төбәктең транспорт инфраструктураһын модернизациялау һәм хоҡуҡ боҙоуҙарҙы асыҡлау саралары тураһында һөйләне. Тәҡдим ителгән саралар иҫәбендә — билдәләрҙе һәм светофорҙарҙы ҡуйыу һәм алмаштырыу, яҡтыртыу системаларын һәм йәйәүлеләр өсөн юлдарҙы урынлаштырыу, юл ҡатламындағы етешһеҙлектәрҙе бөтөрөү һәм тамғаларҙы ҡулланыу, шулай уҡ юл хәрәкәте ҡағиҙәләрен боҙоуҙарҙы бөтөрөү өсөн автоматик комплекстар ҡуйыу тәү сиратта тора. 2023 йыл башынан республикала юл хәрәкәте ҡағиҙәләрен боҙоу тураһында 4,9 миллион ҡарар сығарылған, был 2022 йыл менән сағыштырғанда 20 процентҡа күберәк. Штрафтарҙан алынған аҡса юл инфраструктураһын яңыртыуға тотонола. Бынан тыш, юл-транспорт ваҡиғалары тупланған урындарҙа авария кимәлен кәметеү буйынса саралар комплексы эшләнә. "Республика юлдарында ыңғай динамиканы билдәләйбеҙ. Тимәк, беҙ дөрөҫ йүнәлештә эш итәбеҙ. Юл билдәләре ҡуйыу, авариялар тупланған урындарҙы асыҡлау һәм бөтөрөү, тәртип боҙоусыларҙы яуаплылыҡҡа тарттырыу буйынса эште дауам итергә кәрәк”, – тине Радий Хәбиров. Фотолар Башҡортостан Башлығы сайтынан алынды.