Бөгөн Хөкүмәттәң аҙналыҡ кәңәшмәһендә Башҡортостан Хөкүмәте Премьер-министры урынбаҫары – ауыл хужалығы министры Илшат Фәзрахманов уңыш йыйыу барышы тураһында һөйләне. Ҡатмарлы һауа шарттарына ҡарамай, республикала иген һәм ҡуҙаҡлы иген культураларын тулайым йыйыу 3,235 миллион тәшкил иткән. Был төбәк ихтыяжынан 1 миллион тоннаға күберәк. – Хужалыҡтар майҙандарҙың 97 процентын йыйып бөттө. Иң ҙур уңышты Ғафури, Ҡырмыҫҡалы, Саҡмағош, Шишмә, Стәрлетамаҡ һәм Ауырғазы райондары йыйҙы. Улар гектарынан 25 центнерҙан ашыу иген алды, – тине министр. Әле республикала майлы культураларҙы һәм шәкәр сөгөлдөрөн йыйыу дауам итә. Уңыш майҙандарҙың 60 процентынан йыйып алынған. Бынан тыш хужалыҡтар ужым культураларын ултыртып бөткән. Быйыл эштәр 409 мең гектар майҙанда башҡарылды, был 2022 йыл менән сағыштырғанда 110 мең гектарға күберәк. Ә 2024 йылдың яҙында сәсеү өсөн иген һәм ҡуҙаҡлы иген культуралары орлоҡтарының 90 проценттан ашыуы әҙерләнгән. – Октябрь башында республиканың ауыл хужалығы етештереүселәре йыл һайын Мәскәүҙә үткәрелгән Бөтә Рәсәй “Алтын көҙ” күргәҙмәһендә ҡатнашты. Форум йомғаҡтары буйынса Башҡортостан “Күргәҙмәне үҫтереүгә индергән өлөшө өсөн” номинацияһында Гран-приға лайыҡ булды.Ә 1 ноябрҙә республикала ауыл хужалығы һәм эшкәртеү сәнәғәте хеҙмәткәрҙәре көнө үтәсәк, унда алдынғы етештереүселәрҙе бүләкләйәсәкбеҙ, – тине Илшат Фәзрахманов. Башҡортостан Башлығы аграрийҙарға уңышлы урып-йыйыу кампанияһы өсөн рәхмәт әйтте. Ул артабан да эшкәртеү сәнәғәтен үҫтерергә ҡушты. – Бер нимәгә ҡарамай, беҙ яҡшы уңыш алдыҡ. Күпләп ауыл хужалығы тауарҙары етештереүебеҙ бик шәп. Хәҙер энергияны уны эшкәртеүгә йүнәлтергә кәрәк, – тине Радий Хәбиров. Фото: Башҡортостан Башлығы саййты.