Саҡмағош ҡасабаһының беренсе урта дөйөм белем биреү мәктәбендә район уҡыусыларын тантаналы рәүештә шайморатовсылар сафына ҡабул иттеләр. Сарала район хакимиәте башлығы Реканс Ямалиев, уның социаль мәсьәләләр буйынса урынбаҫары Светлана Шакирова, мәғариф бүлеге етәксеһе Рәсимә Балягова, райондың ДОСААФ бүлеге етәксеһе Ринат Ризванов, мәктәп директорҙары, ижтимағи ойошмалар вәкилдәре ҡатнашты. Район хакимиәте башлығы Реканс Ямалиев шайморатовсыларҙы тормоштарындағы ҡыуаныслы ваҡиға менән ҡотланы, уңыштар теләне һәм күкрәккә тағыла торған билгеләр таратты. Төп дәрестәрҙән тыш, был синыфта белем алған уҡыусылар киңерәк йүнәлештә өҫтәмә белем алыу мөмкинлегенә эйә. Тыуға яҡты өйрәнеү, инглиз теле, физик культура, хәрби әҙерлек һәм башҡа түңәрәктәрҙә шөғөлләнә аласаҡ. Егеттәр һәм ҡыҙҙар мәктәптәр, тотош район күләмендә уҙған мәҙәни һәм спорт сараларында, төрлө бәйгеләрҙә әүҙем ҡатнашасаҡ. “Бөгөн районда өс мәктәп уҡыусылары шайморатовтар сафына баҫты. Былтыр бындай класс бер мәктәптә асылғайны”, - тип билдәләне Рәсимә Балягова. Текст һәм фото авторы: Лиана Ханмурзина.