Рәсәй Федерацияһының Оборона министры приказы менән Әлфир Вафир улы Заманов министрлыҡтың “Хәрби батырлығы өсөн” II дәрәжәле миҙалы менән наградланды. Әлфир ошо көндәрҙә ҡыҫҡа ваҡытлы ялға ҡайтты һәм ғаиләһе, ата-әсәһе, туғандары янында булды. Тыуған яғы Баймаҡ районының Күсей ауылында ял итеп, Күсемташ, Йәнтәл тауҙарына менеп, Мәмилә, Йәкәү буйҙарын иңләп, күңелендәге хис-тойғоларын бушатты, күкрәк киреп йырлап, тыуған яғынан көс һәм рух алып китте. Юғары награда йырсы-яугиргә Санкт-Петербургтағы хәрби часында тапшырылды. Әйткәндәй, күптән түгел Сибай концерт-театр берекмәһенән мобилизацияланған Фидан Фәрит улы Бирғәлин да ошондай уҡ миҙалға лайыҡ булғайны. Фото: "Күсейҙәр" төркөмөнән.