Зилә Радмил ҡыҙы Салауат районының Ишембай ауылында тыуып үҫкән. Тыуған ауыл мәктәбендә һигеҙенсе класты тамамлағас, Мәсәғүт педагогия училищеһына уҡырға инә. Дипломлы белгес булып тыуған ауылы мәктәбендә эш башлай. Тиҙҙән күрше ауыл егете менән ғаилә ҡороп ебәрәләр. Ғаиләнең йәме булып ике ҡыҙҙары һәм улдары тыуа. Әммә яҙмыш тигәнең беҙ теләгәнсә яҙылмай шул: Зилә Радмил ҡыҙының тормош иптәше йәшләй генә мәрхүм булып ҡала. Уға өс баланы яңғыҙ аяҡҡа баҫтырырға, уларға атай ҙә, әсәй ҙә, терәк һәм таяныс та булырға тура килә. Бөгөн балалары әсәләрен уңыштары менән ҡыуандыра. Зилә Шәйәхмәтова тиҫтә йыл самаһы башланғыс кластарҙы уҡыта, артабан Башҡорт дәүләт университетының география факультетын тамамлап, ошо фән буйынса уҡытыуға күсә. Башҡортостан мәғарифты үҫтереү институтында курс үтеп, “Башҡорт теле һәм әҙәбиәте белгеслеге” буйынса ла документҡа эйә була. Әлеге ваҡытта Салауат районының Ишембай ауылы мәктәбендә башҡорт теленән дә, географиянан да һабаҡ бирә. 2017-2019 йылдарҙа ауыл хакимиәте башлығы вазифаһын башҡарырға тура килә уға. Зилә Радмил ҡыҙы – күп яҡлы һәләттәргә эйә уҡытыусы. Бейергә ярата, халыҡ ижады өлгөләрен өйрәнә, төрлө байрамдарҙа ихлас ҡатнаша, үҙе белгәндәрен уҡыусылары менән ихлас уртаҡлаша, улар менән төрлө сараларҙа әүҙем ҡатнашалар. Ул яратҡан эше, үҙе өсөн өҙөлөп торған балалары, ҙур һәм татыу ғаилә булып йәшәгән туғандары булыуы менән бәхетле. Тырыш, һәләтле уҡытыусыға уңыштар, яңы ҡаҙаныштар теләйбеҙ! Фотолар З. Шәйәхмәтованың шәхси альбомынан.