Бөгөн Өфөлә “Төбәкте тотороҡло үҫтереү шарты булараҡ Башҡортостан Республикаһында тел сәйәсәте” төбәк-ара (халыҡ-ара ҡатнашлыҡта) фәнни-ғәмәли конференция бара. Ул “Минең туған телем” программаһының Рәсәйҙең аҫаба халыҡтарының телдәрен һаҡлау буйынса комплекслы саралар планына ярашлы уҙғарыла. Ойоштороусылар – Башҡортостан Республикаһы Хөкүмәте, ЮНЕСКО-ның “Бөтәһе өсөн мәғлүмәт” программаһының Рәсәй комитеты, Китапхана хеҙмәттәшлегенең төбәк-ара-үҙәге, ЮНЕСКО эштәре буйынса Башҡортостан Республикаһы комитеты, М. Аҡмулла исемендәге Башҡорт дәүләт университеты. Конференцияның тәүге өлөшө М. Аҡмулла исемендәге Башҡорт дәүләт университетында үтте. Мостай Кәрим исемендәге залда ойошторолған пленар ултырышта ҡатнашыусыларҙы ЮНЕСКО-ның “Бөтәһе өсөн мәғлүмәт” программаһының Рәсәй комитеты рәйесе, Китапхана хеҙмәттәшлегенең төбәк-ара үҙәгенең генераль директоры, педагогия фәндәре кандидаты Сергей Бакейкин, ЮНЕСКО эштәре буйынса Башҡортостан Республикаһы комитетының башҡарма директоры Элина Ғатауллина сәләмләне. Башҡортостан Башлығының ижтимағи-сәйәси үҫеш буйынса идаралығының бүлек мөдире Зөлфиә Рәхмәтуллина БР Башлығы Хакимиәте етәксеһе Максим Забелиндың рәсми сәләмен еткерҙе. РФ Дәүләт Думаһы депутаты, “Бөтә донъя башҡорттары ҡоролтайы (конгресы)” халыҡ-ара йәмәғәт берләшмәләре союзы президиумы рәйесе Эльвира Айытҡолова бөгөнгө глобализация, мәғлүмәти тиҙлек, технологиялар үҫеше шарттарында милләтте милләт иткән иң төп төшөнсәнең береһе булған туған телдәрҙе һаҡлау, был йәһәттән күрелгән саралар тураһында һөйләне. Башҡортостан миҫалындағы аныҡ эштәргә туҡталды. Удмурт Республикаһының Дәүләт Советы рәйесе урынбаҫары – Удмурт Республикаһының фән, мәғариф һәм граждандар йәмғиәте институттары үҫешенә булышлыҡ итеү буйынса даими комиссия етәксеһе, “Удмурт Кенеш” Бөтә удмурт ассоциацияһы президенты Татьяна Ишматова үҙҙәрендә туған телдәрҙе һаҡлау һәм үҫтереү йәһәтенән алып барылған эш тәжрибәһе менән уртаҡлашты. Ул был тәңгәлдәге проблемаларға ла туҡталды. Шуларҙың иң етдиҙәре итеп мәктәптәрҙә туған телдә белем алыусылар һанының йылдан-йыл кәмей барыуын, удмурт телендәге матбуғат баҫмаларының тиражы кәмеүен, ауыл халҡының, шуның менән бергә милли асылды һаҡлаусы өлөштөң кәмеүен билдәләне. Әйтергә кәрәк, бындай мәсьәләләр аҙ һанлы аҫаба халыҡтар йәшәгән һәр төбәккә хас. “Шуға күрә беҙ бергә һәм берҙәм булырға, үҙ йөҙөбөҙҙө, милли асылыбыҙҙы юғалтмаҫҡа тейешбеҙ” тигән төп фекер яңғыраны күпселек сығыштарҙа. Артабан конференцияла ҡатнашыусылар эште панель дикуссияла дауам итте. Шулай уҡ беҙҙең республикала туған телдәрҙе һаҡлау һәм үҫтереү йәһәтенән алып барылған эштәрҙе асыҡ күрһәткән күргәҙмәләр менән танышыу, төрлө йүнәлештәге оҫталыҡ дәрестәрендә ҡатнашыу мөмкин булды. Автор фотолары.