Бишбүләк үҙәк район дауаханаһының поликлиника бүлексәһендә “Һаулыҡ һаҡлау” милли проектының тәүге звеноны яңыртыу программаһына ярашлы алынған заманса эндоскопик диагностика ҡорамалы эш башланы.160-тан ашыу тикшереү үткәрелгән дә инде. Диагностиканан һуң онкология сиренә шик тыуған алты пациент өҫтәмә тикшереүгә ебәрелгән. Эндоскопия – махсус һығылмалы аппараттар ярҙамында тикшереү һәм дауалау ысулы. Ҡорамал өс гастроскопҡа эйә, идара итеү өлөшө лә бар. Табип пациент өсөн хәүеф тыуҙырмай, күреү контроле аҫтында тейешле ағзаны тикшерә.Эндоскоптың махсус каналы аша кәрәк булған саҡта манипулятор ярҙамында микроскопик тикшереү өсөн биологик материал алырға мөмкин. –Был ҡорамалды файҙаланыу хәҙер пациенттар өсөн хәүеф тыуҙырмай, шланг бик һығылмалы. Биологик материалды алыу, эске ағзаларҙы ҡарау, дауалау ғәмәлдәре юғары теүәллек менән башҡарыла, – ти табип-эндоскопист Ирина Назарова. Рәсәй Президенты Владимир Путиндың май указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологиялар индереү мөһим бурыстар булып тора. ”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, яман шештәрҙән үлем осраҡтарын кәметеү, инновациялы медицина технологиялары индереү, шул иҫәптән пациенттар сәләмәтлеген иртә диагностикалау һәм дистанцияла мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһы маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: Һаулыҡ һаҡлау министрлығы.