Башҡортостанда Эшҡыуарлыҡ аҙналығы башланды. Сара Башҡортостандың эшҡыуарлыҡ һәм туризм министры Рөстәм Афзалов, эшҡыуарҙар хоҡуҡтарын яҡлау буйынса вәкил Ирина Абрамова, бизнесҡа булышлыҡ итеү хеҙмәттәре вәкилдәре, республиканың бизнес-берләшмәләре ҡатнашлығында асылды. Форумда эшҡыуарлыҡ һәм туризм өлкәһендәге көнүҙәк мәсьәләләр һәм алдағы аҙнаға саралар программаһы барланды. — Бөгөн Башҡортостанда 130 меңдән ашыу урта һәм бәләкәй эшҡыуарлыҡ ойошмаһы теркәлгән, шулай уҡ 162 меңдән ашыу үҙмәшғүл эшләй. Беҙҙең бурыс – эшҡыуарҙарға ярҙам итеү саралары тураһында ваҡытында һөйләү һәм уларҙың бизнес-идеяларын тормошҡа ашырыуҙа ярҙам күрһәтеү. Эшҡыуарлыҡ аҙналығы тап ошоға йүнәлтелгән, саралар 6 октябргә тиклем Өфөлә, Стәрлетамаҡта, Бөрөләлә, Сибайҙа онлайн һәм офлайн форматта үтәсәк. Эшҡыуарҙарҙың, үҙмәшғүлдәрҙең һәм үҙ эшен асырға теләүселәрҙең әүҙем ҡатнашырына өмөтләнәбеҙ. Шулай уҡ форумда ҡатнашыусыларҙың барыһын да төбәктә бизнесты үҫтереү шарттарын яҡшыртыр өсөн фекерҙәрен еткерергә саҡырабыҙ, - тип билдәләне Рөстәм Афзалов. Форумдың беренсе көнөндә "Киләсәк фабрикаһы" инновацион эшҡыуарлыҡ йортонда "Бәләкәй һәм урта эшҡыуарлыҡ һәм шәхси эшҡыуарлыҡ башланғысына булышлыҡ итеү" милли проекты сиктәрендә булдырылған Йәштәрҙең инновацион ижад үҙәгендә Асыҡ ишектәр көнө үтте. Башҡортостандың эшҡыуарлыҡ һәм туризм министры Рөстәм Афзалов ойошманың эше менән танышты. Министр шулай уҡ Өфө дәүләт нефть техник университеты студенттары менән осрашты. "Киләсәк фабрикаһы" инновацион эшҡыуарлыҡ йортонда уҡытыусылар һәм инновацион эшҡыуарҙарҙан торған яңы коллектив бар. Балалар һәм йәштәр өсөн прототиптар эшләү менән шөғөлләнергә мөмкинлек биргән 3D-принтер һәм плоттер бар, компьютер бүлмәһе, квадрокоптерҙарҙы йыйыу һәм ремонтлау буйынса дәрестәр үткәреләсәк, компьютерҙа моделле күреү мөмкинлеге лә буласаҡ. Бынан тыш, эшҡыуарҙар һәм үҙмәшғүлдәр өсөн "Уңыш стратегияһы" семинары үтә. Бизнес хәүефһеҙлеге менән һөҙөмтәле идара итеү», «Һандарҙа эшҡыуарлыҡ» вебинары, «Башҡортостан Республикаһы психологтары һәм тренерҙары ассоциацияһын булдырыу» тураһында фекер алышыу, «Сертификатлау һәм тауар билдәләре» консультациялары, шулай уҡ «Бизнеста партнерҙарҙы ҡайҙан эҙләргә» селтәре эшләй. Түбәндәге һылтанма буйынса инеп, форумдың тулы программаһы менән танышырға, теркәлергә мөмкин: https://nedelyarb.ru/ Сараларҙың онлайн трансляцияһы ойошторола: https://www.youtube.com/@user-bw6cc3tf6r/streams Был сараларҙың барыһы ла Рәсәй Президенты Владимир Путиндың май указына ярашлы булдырылған “Бәләкәй һәм урта эшҡыуарлыҡ һәм шәхси эшҡыуарлыҡ башланғысына булышлыҡ итеү" (национальный проект "Малое и среднее предпринимательство и поддержка индивидуальной предпринимательской инициативы") милли проектына ярашлы атҡарыла. Сараның ойоштороусылары – Башҡортостандың бәләкәй һәм урта эшҡыуарлыҡ үҫеше буйынса агентлыҡ, Республиканың Эшҡыуарлыҡ һәм туризм министрлығы, “Минең бизнесым” үҙәге. Фото Башҡортостан Хөкүмәте сайтынан алынды.