1 октябрҙә Рәсәй Президенты ҡарамағындағы Башҡортостан Республикаһының тулы хоҡуҡлы вәкиллеге майҙанында Башҡортостандан сыҡҡан Мәскәү студенттарын беренсе курсҡа бағышлау тантанаһы үтте. Был ҡыҙыҡлы сара «БашПерваш» проекты сиктәрендә ойошторолдо. Студентҡа бағышлау барышында вәкиллек буйынса мауыҡтырғыс экскурсия үткәрелде, йәштәр Мәскәү юғары уҡыу йорттары ҡарамағындағы башҡорт клубтары етәкселәре менән танышты. Беренсе курс студенттары республика тарафынан күрһәтелгән ярҙам саралары тураһында белде, тәмле һый-ниғмәттәр менән һыйланды. Рәсми өлөштән һуң йәштәр ҡаланың тарихи урындары менән бәйле мауыҡтырғыс квест программаһында ҡатнашты, унан тыш, һәр мәсьәләнең тыуған Башҡортостанға ҡағылышы бар ине. Был студенттар өсөн тыуған илебеҙҙең тарихы һәм мәҙәниәте менән танышыу өсөн уникаль мөмкинлек булды. Күркәм сара ҙур мәҙәни программа менән тамамланды, «Бишбармаҡ» төркөмө сығыш яһап, бөтәһенә лә онотолмаҫлыҡ хис-тойғолар бүләк итте. Башҡортостандың студенттар һәм аспиранттар ассоциацияһынан белдереүҙәренсә, был ваҡиға студенттар өсөн уҡыу йылының сағыу башы булыр: – Бөтә беренсе курс студенттарын студент тормошона уңышлы бағышлау менән ҡотларға теләйбеҙ. Был уҡыу юлындағы мөһим аҙым. Улар артабан да берҙәм, татыу булыр һәм ҡаршылыҡтарға бирешмәҫ, һөҙөмтәле итеп уҡыр, киләсәктә республикабыҙ һәм тыуған илебеҙ өсөн файҙалы шәхес булыр, тип ышанабыҙ, - ти ойошма ағзалары. "БашПерваш" сараһы "БашСтьюдентс" башҡорт йәштәр хәрәкәте" проекты сиктәрендә Башҡортостан Республикаһы Башлығы Гранттары Фонды, шулай уҡ Башҡортостан Республикаһының Рәсәй Президенты ҡарамағындағы тулы хоҡуҡлы вәкиллеге ярҙамында тормошҡа ашырылған. Фото: Башҡортостандың студенттар һәм аспиранттар ассоциацияһы.