Өфө тығындары ялҡытты

Хөкүмәттең был аҙналағы оператив кәңәшмәһен Башҡортостан Хөкүмәте Премьер-министры Андрей Назаров үткәрҙе. Ул уҙған аҙнаның мөһим ваҡиғаларына һәм сараларына йомғаҡ яһаны, яңыһына бурыстар билдәләне. Һаулыҡ һаҡлау министры Айрат Рәхмәтуллин белдереүенсә, Башҡортостанда ОРВИ һәм киҙеү менән сирләү арта. Ошоға бәйле табиптарҙы өйгә саҡыртыу осраҡтары ла күбәйгән. Үткән аҙнала ғына 20 меңдән ашыу саҡырыу булған. Шулай уҡ министр әйтеүенсә, грипҡа ҡаршы вакцинация дауам итә. Бынан тыш коронавирус менән сирләү ҙә арта. Уҙған тәүлектә сирҙе 68 кешелә тапҡандар. Дауаханаларҙа 105 кеше ята, өйҙәрендә 980 кеше дауалана. Башҡортостандың дүрт йоғошла сирҙәр госпиталендә буш урындар һаны 11-15 процент тәшкил итә. Сирләүселәр артыуға ҡарап, урындар һаны ла арттырыласаҡ. Андрей Назаров COVID-19 менән сирләү артыу осрағына әҙерлек юғары булырға тейеш тине. Мәскәү һәм ҡайһы бер башҡа төбәктәрҙә сикләү саралары индерелә башланғанын әйтте. Тышҡы иҡтисади бәйләнештәр һәм конгресс эшмәкәрлеге министры Маргарита Болычева Ҡаҙағстан менән хеҙмәттәшлек тураһында һөйләне. Асыҡланыуынса, яҡын арала Башҡортостанға рәсми сәфәр менән Ҡаҙағстандың Премьер-министры Алихан Смаилов киләсәк. Шулай уҡ республиканың сәнәғәт һәм төҙөлөш министры Ҡанат Шарлапаев та көтөлә. Әлеге ваҡытта ике яҡ өсөн дә уңайлы ваҡыт һайлана. Ғөмүмән, был ил менән бәйләнештәребеҙ нығына. Әле билдәле булыуынса, Ҡаҙағстанда быйылғы йылдың аҙағына тиклем Башҡортостандың рәсми вәкиллеге асыласаҡ. Был тантаналы сарала Башҡортостан Башлығы Радий Хәбиров та ҡатнашасаҡ. Бынан тыш, Маргарита Болычева әйтеүенсә, ноябрь башында Башҡортостан делегацияһы Ҡостанайҙа үтәсәк төбәк-ара хеҙмәттәшлек форумына барасаҡ. Ул сара Рәсәй һәм Ҡаҙағстан президенттары ҡатнашлығында үтергә тейеш. – Унда беҙҙең яҡ пленар ултырышта доклад менән сығыш яһар тип көтөлә, – тине министр. Кәңәшмәлә баш ҡалала юлдар ремонты һәм ошо арҡала тыуған проблемаларға ҙур иғтибар бирелде. Башҡортостан Башлығының Социаль коммуникациялар буйынса идаралығы етәксеһе Елена Прочаковская әйтеүенсә, әлеге ваҡытта Өфөлә бығаса булмаған күләмдә юлдар һәм күперҙәр ремонтлана. Был иһә үҙ сиратында ҙур тығындарға килтерә. Шуға күрә Республикаға идара итеү үҙәге Транспорт һәм юл хужалығы министрлығына ремонт яһағанда һәм ҙур саралар үткәргән саҡта юлдарҙы ябыуҙы регламентларға кәрәк тигән тәҡдим менән сыҡҡан. – Бер юлы күперҙәр ремонтлайбыҙ, юлдар һалабыҙ, ана Пугачев урамын яптыҡ. Әлбиттә, былар бик мөһим һәм кәрәк. Шулай уҡ беҙгә кәрәкле ҙур саралар һәм форумдар үтә. Тик был кешеләгә уңайһыҙлыҡ тыуҙыра. Шуға күрә беҙҙең министрлыҡҡа тәҡдим бар һәм улар уны хупланы, Хөкүмәт тә хуплар тип ышанабыҙ. Һәр юлды ябыу регламентҡа ярашлы булһын ине. Эштәрҙе кәрәк саҡта башларға түгел, ә барыһын да килешкәс кенә эшләргә кәрәк. Транспорт һәм юл хужалығы министрлығы бының менән ныҡлы шөғөлләнһен, – тине ул. Хөкүмәт Премьер-министры Андрей Назаров шулай уҡ Өфөләге тығындар менән проблеманы хәл итергә ҡушты. – Хәлде анализлау шуны күрһәтә: тығындар юл эштәре һәм авариялар арҡаһында барлыҡҡа килә. Беҙ ЮХХДИ, Транспорт һәм юл хужалығы министрлығы менән һөйләшеп килештек, авария эҙемтәләрен бөтөрөүҙә тиҙлекте арттырыр кәрәк. Был эштә дөйөм тырышлыҡ мөһим, ҡала хакимиәте, министрлыҡ, ЮХХДИ бергә эшләйек. Кешеләр юлға сәғәттәр буйы ваҡытын әрәм итергә тейеш түгел, – тине ул. Республиканың Эшҡыуарлыҡ һәм туризм министры Рөстәм Афзалов хәбәр итеүенсә, кисәнән республикала Эшҡыуарлыҡ аҙналығы башланды. Сара 6 октябргә тиклем дауам итеп, Өфө, Стәрлетамаҡ һәм Бөрөлә онлайн һәм офлайн тәртиптә үтәсәк. – Был – эшҡыуарҙар өсөн мөһим сара, ул төбәк һәм федераль власть органдарын, бизнес вәкилдәрен, йәмәғәт берекмәләрен берләштерә, кәңәшләшер, тәжрибә уртаҡлашыр өсөн урын, – тине министр. Эшҡыуарлыҡ аҙнаһы сараларында 100-ҙән ашыу спикер ҡатнашасаҡ, улар шул иҫәптән Ҡаҙағстандан һәм Мексиканан да киләсәк. Фото: "Башинформ".