“Пакер” фәнни-производство фирмаһы “Хеҙмәт етештереүсәнлеге” милли проектында (национальный проект "Производительность труда") ҡатнашыу дәүерендә һөҙөмтәлелеген өс тапҡырға арттырҙы һәм башҡа предприятиелар менән һаҡсыл технологиялар индереү тәжрибәһе менән уртаҡлаша. Был турала төбәктең Иҡтисади үҫеш һәм инвестиция сәйәсәте министрлығында хәбәр иттеләр. -“Хеҙмәт етештереүсәнлеге” милли проекты программаһын тормошҡа ашырыуҙың этаптарының береһе төбәктең компетенциялар үҙәге эксперттары тарафынан моделле тип танылған предприятиеға барыу, яңы предприятиелар менән тәжрибә уртаҡлашыу һәм һаҡсыл производство принцибын үҫтереү. “Пакер” фәнни –производство фирмаһы проектты тормошҡа ашырғанда юғары һөҙөмтәләр күрһәтә, - тине Республиканың Иҡтисади үҫеш һәм инвестиция сәйәсәте министрының беренсе урынбаҫары Айрат Фәхретдинов. Әйтергә кәрәк, милли проектта ҡатнашыу осоронда компанияның етештереүсәнлеге өс тапҡырға тиерлек артҡан. Хәҙер “Пакер” моделле предприятиеға әүерелде. Фирма үҙенең производство системаһын үҫтереүҙе дауам итә, һөҙөмтәле идара итеү алымдарын тормошҡа ашыра, милли проекттың башҡа ҡатнашыусыларын һаҡсыл технологиялар менән таныштыра. Мәҫәлән, үҙенең тәжрибәһе менән ойошма Өфө селекция –гибрид үҙәге менән уртаҡлашты, ул быйыл яҙ оптимәлләштереүгә тотондо. “Хеҙмәт етештереүсәнлеге” милли проекты илдә хеҙмәт етештереүсәнлегенең йыллыҡ үҫешен 5 процентҡа тиклем арттырыу өсөн шарттар тыуҙырыуға маҡсатланған. Бизнесҡа ярҙамға саралар комплексы әҙерләнгән, шул иҫәптән финанс яҡтан дәртләндереү һәм эксперттар консультациялары. Ил Президенты Владимир Путин башланғысы менән булдырылған милли проекттар 2019 йылда старт алды. Фото: Башҡортостан Хөкүмәте сайты.