“Мәғариф” милли проектының “Һәр баланың уңышы” һәм “Киләсәккә билет” һөнәри йүнәлеш проекттары сиктәрендә Салауат ҡалаһының 8-се лицейы уҡыусылары Салауат индустриаль колледжының 2-се уҡыу корпусында булды. “Кем булырға?” – хеҙмәт баҙарында конкуренция уҡыусыларҙы һәм уларҙың ата-әсәләрен дөрөҫ һайлау өҫтөндә уйланырға мәжбүр иткән, өлкәнәйеү алдында торған йәштәрҙе борсоған мөһим мәсьәлә. Ҡабул ителгән ҡарар кешенең артабанғы яҙмышына йоғонто яһай. Оло донъяла оҡшаған һөнәр табыуы, дөрөҫ йүнәлеш алыуы, юғалып ҡалмау йәш кешегә бик мөһим. Ул үҙенең һайлауын тәү сиратта үҙенә, унан йәмғиәткә һәм хеҙмәт баҙары мәнфәғәттәренә кәрәкле булған һөнәргә туҡтатырға тейеш. Йәштәргә тормошта үҙ урынын табырға ярҙам итеү өсөн һөнәри йүнәлеш буйынса осрашыуҙар, уҡыу йорто һәм уҡытыусылар менән танышыу ҡаралған. Балаларға колледжда тәҡдим ителгән һөнәрҙе һайлау мөмкинлеге тураһында һөйләнеләр. Бында Башҡортостандың көньяғында иң күп бюджет урындары бар, 13 һөнәр һәм алты эшсе һөнәре буйынса уҡыталар. Уҡыусыларға уҡыу өсөн заманса ҡорамалдар: автооҫтахана, химия лабораторияһы, слесарлыҡ оҫтаханаһы менән йыһазландырылған оҫтаханалар һәм лабораториялар күрһәтелде. Кисәге мәктәп уҡыусылары, хәҙер иһә Салауат индустриаль колледжы студенттары экскурсия үткәрҙе һәм үҙҙәренең оҫталығын күрһәтте, “Профессионалитет” федераль программаһында ҡатнашыуҙары хаҡында һөйләне. Бындай осрашыуҙар сиктәрендә балаларҙың буласаҡ һөнәр һайлағанда белем алыу эшмәкәрлеген яйға һалыу мөмкинлеге бар. Билдәле булыуынса, “Мәғариф” (национальный проект “Образование”) милли проекты Рәсәй Президенты Владимир Путиндың май указы менән булдырылды. Фото: Салауат ҡалаһы хакимиәте.