Өфөлә Олимпия советтары форумы бара

8 октябргә тиклем Өфөлә Бөтә Рәсәй Олимпия советтары форумы үткәрелә. Бөгөн сара Өфөләге “Торатау” конгресс-холында башланды. Унда Рәсәйҙең 84 төбәгенән Олимпия советтары етәкселәре һәм ағзалары ҡатнаша. Быйыл шул иҫәптән Луганск һәм Донецк халыҡ республикаларының, Запорожье һәм Херсон өлкәләренең Олимпия советтары ла барлыҡҡа килде. Спорт һәм Олимпия хәрәкәте үҫешенең көнүҙәк темалары, Рәсәйҙең Олимпия комитеты булышлығында юғары ҡаҙаныштар һәм күпләп кеше ҡатнашҡан спортҡа бәйле хеҙмәттәшлекте киңәйтеү, Рәсәй спорт үҫеше һәм башҡалар тураһында һөйләшеүҙәр бара. Сараны Башҡортостан Хөкүмәте Премьер-министры урынбаҫары Ирек Сәғитов асты һәм сарала ҡатнашыусыларға Башҡортостан Башлығы Радий Хәбировтың ҡотлау сәләмен еткерҙе. Ул сығышында шулай уҡ республикала ҙур спорт сараларының үткәрелеүе, яңы спорт объекттарының төҙөлөүе, булғандарының үҙгәртеп ҡоролоуы тураһында һөйләне һәм форумда ҡабул ителгән ҡарарҙарҙың спорт үҫешенә ҙур этәргес буласағына ышаныс белдерҙе. Рәсәйҙең Олимпия комитеты рәйесе Станислав Поздняков, комитеттың генераль директоры Владимир Сенглеев, Луганск Халыҡ Республикаһының спорт министры вазифаһын башҡарыусы Олег Шеренешев сығыш яһаны. - Мин Башҡортостанда икенсе тапҡырмын. Спортсыларбыҙ һеҙҙең балаҫтарҙа призлы урын яулағайны. Луганск Халыҡ Республикаһы туғыҙ йыл Олимпия хәрәкәтенән ситләтелгәйне. Олимпия советының барлыҡҡа килеүе тураһындағы хәбәрҙе спортсылар ҡыуанып ҡабул итте. Беҙҙә тармаҡтың 70-тән ашыу төрө менән шөғөлләнәлр. Уларҙың 30-ы – Олимпия төрҙәре, - тип белдерҙе Олег Шеренешев. Быйыл иһә Башҡортостандың Спорт министрлығы 100 йыллыҡ матур юбилейын билдәләй. Республиканың спорт министры Руслан Хәбибов был форумдың Башҡортостанда үткәрелеүенең беҙҙең өсөн мөһим икәнлеген һыҙыҡ өҫтөнә алды, төбәктә спортҡа ҙур иғтибар бүленеүе тураһында һөйләне. Башҡортостанда йәшәгән ике миллиондан ашыу кеше даими рәүештә спорт менән шөғөлләнә. Республикала барлығы 13 меңдән ашыу спорт ҡоролмаһы бар һәм төбәктә спорттың 120 төрө үҫешә. Тағы республикабыҙҙа йыл һайын 15 меңдән ашыу спорт һәм физик культура сараһы ойошторола: “Спорт ун көнлөгө”, “Өмөтөбөҙ боҙо”, “Рәсәй саңғы юлы”, “Рәсәй азимуты”, “Олимпия көнө” кеүек тематик сара үткәрелә. Бынан тыш, 2022 йылдан вуздар араһында Башҡортостан Башлығы Кубогына йәйге һәм ҡышҡы спорт төрҙәре буйынса универсиада уҙғарыла. Иртәгә форумда ҡатнашыусылар Өфөлә үтәсәк Бөтә Рәсәй йәйәү йөрөү көнөндә ҡатнаша. Был сара октябрҙең беренсе ял көндәрендә тотош донъя буйлап Халыҡ-ара “Спорт барыһы өсөн” эгидаһы аҫтында уҙғарыла. Рәсәйҙә был форум 2015 йылдан илдең Олимпия комитеты тарафынан тормошҡа ашырыла. Әйткәндәй, ике йыл элек был сара баш ҡаланың Ағиҙел буйында үткәрелгәйне. Төп маҡсат – мөмкин тиклем күберәк ҡатнашыусыларҙы физик йәһәттән әүҙем булырға, спорт менән шөғөлләнергә өндәү, физик әүҙемлектең өҫтөнлөктәре тураһында хәбәрҙар булыуҙы арттырыу, әүҙем тормош алып барыуҙың төрлө төрҙәре хаҡында бәйән итеү. Спорт байрамы үҙ эсенә флешмоб – чемпион менән зарядканы, сәләмәт тормошто яратыусыларҙың 2 мең 23 метр арауыҡты үтеүе, ижади, спорт-һауыҡтырыу программаһын, физик культура һәм спорт тармағындағы атҡаҙанған хеҙмәткәрҙәрҙе бүләкләүҙе ала. Сарала ҡатнашыусыларҙы теркәү шәмбе 10 сәғәттә башлана, ә ярыштар 11 сәғәт 30 минутта старт ала. Финишҡа килгән һәр кемгә шоколадлы миҙал һәм диплом тапшырыла. Йола буйынса өфөләр менән бергә билдәле спортсылар, Олимпия уйындары чемпиондары ҡатнапша. Быйыл иһә фехтование буйынса дүрт тапҡыр Олимпия уйындары чемпионы, Рәсәйҙең Олимпия комитеты президенты Станислав Поздняков ҡатнаша. Айрат Нурмөхәмәтов фотолары.