Бынан ете ай элек, февралдә баш ҡалабыҙҙа бик ҡурҡыныс фажиғә булғайны. 41 йәшлек ир тәүҙә ике улын үлтерҙе, аҙаҡ үҙенә ҡул һалды. Уның 33 йәшлек ҡатыны һәм 10 йәшлек ҡыҙы ғына ҡасып ҡотола алды. Хәл иртә менән башлана. Айыҡ ир тик торғанда улдарының береһенә ташлана. Баланың ҡысҡырыуына уянған ҡатыны ирен туҡтатырға маташа, тик ул уны быуа башлай. Ҡатын нисектер ире ҡулынан ысҡына һәм ҡыҙы менән сығып ҡаса. Ҡатын күршеләренән ярҙам һорап ишек ҡаға башлай, бер күршеһе уны индерә һәм полиция саҡырта. Тик һуң була. Ир ете һәм 13 йәшлек ике улын үлтерә, аҙаҡ үҙенә ҡул һала. Әле “Башинформ” мәғлүмәт агентлығы иргә үлгәндән һуң яһалған судмедицина экспертизаһы һөҙөмтәләре тураһында яҙа. Шулай, эксперттар асыҡлауынса, фажиғәгә тиклем бер нисә аҙна алда ирҙең депрессия торошо башланған. Ул үҙен насар тойған, йоҡлай алмаған, хафаланған, насар кәйефтә булған. Килеп сыҡҡан хәлдән ҡасып булмау һәм үҙен эшкинмәгән итеп тойоу арҡаһында үҙ-үҙенә ҡул һалыу тураһында насар уйҙар тыуған. Быға тиклем ҡыҙыҡ булған әйберҙәргә иғтибарын юғалтҡан. Борсолоу һәм апатаия тойғоһо көндән-көн артҡан. Ул яҡындарына ҡысҡыра, агрессия күрһәтә башлаған. Уның “күңел” торошо хәлде айыҡ баһаларға мөмкинлек бирмәгән, ул үҙ-үҙенә хужа булмаған һәм тирә-йүндәгеләргә хәүеф тыуҙырғанын аңламаған. 41 йәшлек ир Ишембайҙан булған, “Нефтеавтоматика” компанияһында инженер булған. Психиатрҙа иҫәптә тормаған, ғаилә имен тип иҫәпләнгән. Фото: "Башинформ".