Туй тамуҡҡа әүерелгән...

Ираҡтағы туй тамуҡҡа әйләнә. Ҡыҙыл ярым ай ойошмаһы хәбәр итеүенсә, тантаналы сарала янғында 450-нән ашыу кеше һәләк булған. Фажиғәгә фейерверктар сәбәпсе булыуы ихтимал. Фажиғә булыр тип кем уйлаһын. 26 сентябрҙә кис ҡунаҡтар Ханин һәм Ревандың туйына йыйыла. Билдәһеҙ сәбәп менән тантаналы саралар залында янғын сыға. Урындағы полиция мәғлүмәттәре буйынса, туйҙа меңгә яҡын ҡунаҡ булған. Ираҡ полицияһы мәғлүмәттәре буйынса, Хамдания районында туйҙа 100-ҙән ашыу кеше һәләк булған, тағы ла 150 кеше яралана, ә Ҡыҙыл ярым ай ойошмаһы иһә 450 кеше һәләк булыуы мөмкин тип белдерә. Улар араһында балалар ҙа бар. Уттан иҫән сығып ҡалған кешеләр әйтеүенсә, бер нисә секунд эсендә ялмап алған янғын зал эсендә кейәү менән кәләштең вальс бейеүе алдынан фейерверктан сыҡҡан. Видеояҙманы ҡарауы ҡурҡыныс: яңы өйләнешкән пар залда әкрен генә бейей. Ханин ниндәйҙер мәлдә ҡурҡыуынан борола һәм стеналар буйлап ялҡындың тиҙ күтәрелеүен, ә һуңынан ҡыйыҡтан янған материалдың төшөүен күрә. Ғауға башлана: 900-гә яҡын ҡунаҡ сығыу урындарына ташлана, ә зал бер нисә секунд эсендә ялҡын һәм ағыулы төтөн менән тула. Ҡотолоусылар әйтеүенсә, уларҙың күбеһе янған бинала ҡалған, сөнки ҡара төтөн аша бер нәмә лә күренмәй. Янғын һөҙөмтәһендә зыян күргән ир дауаханала ята, ул: “Улар фейерверкты ҡабыҙҙы. Ул янып китеп түшәмгә бәрелде. Бөтә зал бер нисә секунд эсендә ут эсендә ҡалды”, - ти. “Был туй булманы. Был - тамуҡ!” – ти иң яҡын кешеләрен юғалтҡан Мариам Хедр. Мәғлүм булыуынса, уның 27 йәшлек ҡыҙы һәм өс ейәне һәләк булған, бәләкәсенә бары һигеҙ генә ай. Ниневия провинцияһы губернаторы урынбаҫары Хәсән әл-Аллаф 113 кешенең үлеме раҫланған тип белдерә, шул уҡ ваҡытта провинцияның Ҡыҙыл Ярым ай бүлеге башлығы һәләк булғандар һаны тулыһынса түгел, әммә “ул йөҙҙәрсә яраланған һәм тиҫтәләгән кеше һәләк булған” ти. Банкет залында саралар үткәреү өсөн яуаплы булған туғыҙ кеше ҡулға алынған. Янғын тураһында хәбәр ителгәндән һуң бина хужаһы Ҡурд автономияһы территорияһына ҡасҡан, Ираҡтың именлек хеҙмәте уны ҡулға алыу өсөн бөтә көсөн һала. Яңы өйләнешкән парҙың яҙмышы әлегә билдәһеҙ. Бер мәғлүмәт сығанағы буйынса, улар һәләк булған, икенселәр “улар иҫән ҡалған” ти. Йәштәрҙең бер туғаны: "Беҙ был урындан мөғжизәле рәүештә сыға алдыҡ. Ҡотолоусылар араһында кейәү менән кәләш бар. Мин улар менән булдым, уларҙың психологик торошо бик ауыр хәлдә. Мин бер нисә яралыны дауаханаға алып барҙым. Дауаханала күргәндәремде тасуирлау ауыр”, - ти. Иҫән ҡлаһалар ҙа, бындай туйҙан һуң бәхетле йәшәп буламы икән... Фото: скриншот.