Бөрө ҡалаһының телмәре боҙолған уҡыусылар өсөн коррекция мәктәп-интернаты «Герой партаһы» тигән Бөтә Рәсәй патриотик проектына ҡушылды. Герой партаһында батырҙың фотоһүрәте ҡуйыла, уның биографияһы, ҡаҙаныштары яҙыла. Был парта артына уҡыу алдынғылары, активистар, спорсылар ултыра. Проекттың маҡсаты – балалар һәм үҫмерҙәрҙә Ватан тарихына, илебеҙҙең үткәненә һәм бөгөнгөһөнә ихтирам тәрбиәләү. Ошо көндәрҙә Бөрө ҡалаһының коррекция мәктәп-интернатында “Герой партаһы” асылды. Был парта ошо мәктәпте тамамлаған, махсус хәрби операцияла ҡатнашҡан егет Эмиль Кәшәфетдинов иҫтәлегенә асылды. Уның артына мәктәптең иң тырыш, иң һәләтле уҡыусылары ғына ултырырға лайыҡлы. Башҡортостандың Мәғариф һәм фән министрлығының махсус белем биреү бүлеге етәксеһе Миләүшә Латипова ҡунаҡтарҙы тәбрикләп, “Герой партаһы”н асыуҙың мәктәп тормошонда мөһим ваҡиға булыуын билдәләне. Был партаның уҡыусылар өсөн яҡшы уҡыуға, спортта, ижадта, хеҙмәттә яҡшы һөҙөмтәләргә өлгәшеүгә этәргес булырына ышаныс белдерҙе. Уҡытыусылар һәм уҡыусылар ил азатлығы өсөн ғүмерен биргән Эмиль Кәшәфетдиновтың батырлығын онотмаҫ, уның яҡты иҫтәлеге яҡташтары күңелендә һәр ваҡыт һаҡланыр. Башҡортостан Республикаһының Дәүләт Йыйылышы - Ҡоролтай депутаты Яков Кугубаевтың һүҙҙәре лә йәш быуын өсөн фәһемле булды. -Данлы тарихыбыҙҙы, яратҡан илебеҙҙе һәм тыныс күгебеҙҙе һаҡлау өсөн барыһын да эшләйбеҙ. Беҙҙең өсөн ғүмерен биргән Эмиль Кәшәфетдинов һымаҡ һаҡсыларыбыҙ батырлығы ла онотолмаҫ, -тине ул. Бөрө муниципаль районы хакимиәте башлығының социаль мәсьәләләр буйынса урынбаҫары Андрей Плотников үҙенең сығышында иленең ысын патриоты булған ул үҫтергән өсөн яугирҙең әсәһенә рәхмәтен белдерҙе. Бер минутлыҡ тынлыҡтан һуң әсәй кеше һәм ҡунаҡтар ҡыҙыл таҫманы киҫеп "Герой партаһы"н асты. Был көндө спорт саралары ла ойошторолдо. Махсус хәрби операция геройҙарына арнап еңел атлетика буйынса ярыштар уҙҙы. Унда республиканың коррекция һәм дөйөм белем биреү ойошмаларынан 22 команда, йәғни 180 уҡыусы ҡатнашты. Фото:Бөрө ҡалаһының коррекция мәктәп-интернаты архивынан.