Баш ҡалабыҙҙың юғары кимәлдәге абруйлы йыйындар үҙәгенә әүерелә барыуы бәхәсһеҙ. Киләһе өс көнгә ул илдең энергетика үҙәге лә булып торасаҡ – бөгөн бында Рәсәй энергетика форумы һәм ХХIХ “Урал энергетикаһы” халыҡ-ара күргәҙмәһе эшен башланы. Был вәкәләтле сарала Рәсәйҙең 20 төбәгенән һәм Беларусь, Ҡытай, Әрмәнстан, Ҡырғыҙстандан энергетика тармағының 110 компанияһы ҡатнаша. Ойоштороусылар – Башҡортостан Хөкүмәте, республиканың Сәнәғәт, энергетика һәм инновациялар министрлығы, Башҡортостан күргәҙмәләр компанияһы. Форумдың маҡсаты - тармаҡ компаниялары, дәүләт власы органдары, ассоциациялар һәм ғилми йәмәғәтселек араһындағы диалог өсөн йоғонтоло майҙансыҡ булдырыу. Был конгресс-күргәҙмә сараһы йыл һайын үткәрелә. Форум “Рәсәйҙең энергетика тармағы үҫешенең өҫтөнлөклө йүнәлештәре: бөгөнгө һәм киләсәк” тигән пленар ултырыш менән башланып китте, унда “Интер РАО” акционерҙар йәмғиәтенең генераль директоры урынбаҫары Тамара Меребашвили тәбрикләү һүҙе менән сығыш яһаны. Шунан һуң Башҡортостан Хөкүмәте Премьер-министры урынбаҫары Алан Марзаев республиканың торлаҡ-коммуналь хужалығында электр энергияһын һаҡсыл тотоноу буйынса күрелгән саралар тураһындағы доклад менән сығыш яһаны. Артабан йыйынға килгәндәрҙе “Йылы киләсәк” оҫталыҡ дәресе, инновациялар буйынса секция, энергияны һаҡсыл тотоноуға арналған түңәрәк өҫтәл һәм башҡа саралар көтә. Ошо уҡ сара эсендә Йәштәр форумы уҙғарыу ҙа ҡаралған, унда төп энергетика компаниялары директорҙары менән осрашыу, энергетик диктант ойоштороуҙы планлаштырғандар. Айрат Нурмөхәмәтов фотоһы.