Туйға саҡырылмаған инәй бөтәһен дә илатты

...Ҡала паркында күсмә никах теркәү тантанаһы бара. Автор сараны видеоға теркәй. Әммә уның иғтибары кәләш менән кейәүҙә түгел, ә ситтәрәк торған оло йәштәге өләсәйҙә. Үҙенең йомошо менән китеп барған мосолман әбейе, туҡтап, тантананы күҙәтә, ҡунаҡтарға ҡушылып ихлас ҡул саба, ә үҙе йәштәргә яратып, һоҡланып ҡарай. Бөхтә күлдәктә, яулығын боронғоса яҙып ябынған, ҡулында – таянған таяғы. Интернет комментарийҙар менән тулды, видеояҙма пабликтан пабликка осто... Мин тап булған төркөмдә генә уға 180 меңгә яҡын лайк ҡуйғандар, 8 миллион 200 мең тапҡыр ҡарағандар ине. Комментарийҙар иҫ киткес ихлас, йылы. Барыһы ла оло инәйгә һоҡлана һәм был матур яҙманы төшөргән авторға рәхмәт әйтә. Күптәре "иланым", "рәхмәт", "үҙен барып ҡосаҡлағым килде", "минең өләсәйемде хәтерләтте", "һағынам" ти. Бер нисә фекерҙе килтерәм. Гөлнара Әмировна:"Һөйкөмлө. Унан шул тиклем йылылыҡ бөркөлә. 100 тапҡыр ҡараным..." Наталья Игнаткина: "Ой, ниндәй тулҡынландырғыс осрашыу... Илап та алдым... Өләсәйгә һаулыҡ һәм оҙон ғүмер теләйем". Любовь Бульдикова:"Ниндәй матур өләсәй! Эстән нур сәскән кешеләр була бит!" Сабина Мөхәмәҙиева:"Өләсәй шундай ихлас ҡыуана. Моғайын, йәштәргә ҡарап, үҙенең йәшлеген, мөхәббәтен, ғөмүмән, барлыҡ ғүмерен иҫкә төшөргәндер. Эстән генә уларға фатихаһын да биргәндер. Ошондай мәлдәр баһалап бөткөһөҙ, беҙ ҡайһы берҙә тормош мәшәҡәттәре араһында шуларҙы күрмәй ҙә ҡалабыҙ. Авторға донъяны күрә белгән өсөн айырым рәхмәт". Алексей Федотенко:"Был өләсәйҙең һәм уларҙың быуынының тормошо күпкә ҡатмарлыраҡ булған, бындай туйҙар һирәктәр өлөшөнә тәтегән. Заман биргән мөмкинлектәргә шөкөр итегеҙ!" Ирина Трефилова:"Йөрәгем өҙөлөп төшә яҙҙы. Ысынлап та, ике донъя: бай тормош тәжрибәһе һәм йәшлек. Бөтәһе лә мөхәббәтле һәм бәхетле булһын, оҙаҡ йәшәһен. Өләсәй иҫ киткес шәп. Унда тотош ғүмер сағыла". Рәмил Әхмәҙуллин:"Минең, 40 йәшлек ирҙең дә күҙе йәшләнде. Һоҡланғыс өләсәй. Имен-һау килеш оҙаҡ йәшәһен". Денис Тимурович: "Хәҙер улар айырылышырға тейеш түгел. Өләсәйҙе ҡайғыртырға хаҡтары юҡ". Был күҙҙе лә алып булмаған мөләйем инәйҙе башҡорт йә татар өләсәйе тип яҙыуҙары дөп-дөрөҫ. Ә бына ҡайҙан? Кемдер – Башҡортостандан, кемдер Татарстандан, ти. Баҡһаң, был тантанала булған кешеләр ҙә, өләсәйҙе белгәндәр ҙә бар икән. Луиза Туҡтағолова, видеояҙманы туйҙы ойоштороусы Альбина төшөрҙө, ти. Ул минең шәхсән яҙып һорауыма ҡаланың да Стәрлетамаҡ булыуын раҫланы. Дэнечка Сафина тантана барған урынды таныны. "Унда транспорт туҡталышына илткән бәләкәй генә юл бар, ошо паркта күсмә никах теркәүҙәр үтә. Бик матур урын. Ҡайһы берҙә үҙем дә туҡтап, ҡарап торам", - ти ул. Деша Денис өләсәйҙе белә: "Уның исеме Венера. 90 йәше тулып бара инде. Интернетта туғандары уның тураһында бик йылы итеп яҙалар". Элина Алексеева ла уны таный. "Был яҡшы күңелле инәйҙе бала саҡтан беләм. Яңыраҡ мәрхүм булған өләсәйемдең иң яҡын әхирәте, оҙаҡ йылдар бер йортта, бер ҡатта йәшәнек. Ул яңғыҙ түгел, балалары һәм ейәндәре бар, бик яраталар үҙен. Венера өләсәйгә Хоҙай һаулыҡ насип итһен", - тигән ул. Ысынлап та, бик матур, мәғәнәле ролик. Мин дә уны әллә нисә тапҡыр ҡараным. Венера өләсәйгә бәхетле ҡартлыҡ теләйем! Видео: https://vk.com/sekret_dnevnik_vam Фото: https://ru.freepik.com/free-photo/