Әлдә һеҙ бар, ирекмәндәр!

2022 йылдың 26 сентябренән Башҡортостан Башлығы Радий Хәбировтың ҡушыуы буйынса республикала Рәсәй Геройы Миңлеғәле Шайморатов исемендәге ирекмәндәр штабы эш башлағайны. Бөгөн, теүәл бер йыл үткән көндө был эшмәкәрлеккә бер ни тиклем йомғаҡ яһалды. Бөгөнгә республиканың ирекмәндәр штабында һәм уның бүлексәләрендә ике меңдән ашыу кеше иҫәпләнә. Республикала 63 урындағы штаб эшләй. Ойошма ағзалары яҡташтарына – махсус хәрби операция зонаһында хәрби бурысын үтәгәндәрҙең туғандарына, ғаиләләренә ҙур ярҙам күрһәтә. Штаб ирекмәндәре менән бөгөн Башҡортостан Башлығы хакимиәте етәксеһе Максим Забелин осрашты. Ул – Башҡортостан эвакуация комиссияһы рәйесе, Луганск һәм Донецк халыҡ республикалары граждандарына ярҙам ойоштороу буйынса оператив штаб рәйесе урынбаҫары. Ул, бер йыл эсендә штаб ыңғай баһаға лайыҡ булды, тип билдәләне. – Бөгөн был мөһим штабтың асылыуына бер йыл тулды. Штаб ирекмәндәренең эше отчеттар буйынса түгел, ә уларҙың ысынбарлыҡтағы эштәре буйынса күренә. Махсус хәрби операция зонаһына 95-тән ашыу гуманитар ылау ебәрелде. Уларҙың составында беҙҙең яугирҙәр өсөн генә түгел, ә граждандар өсөн дә йөк бар. Был – төҙөлөш материалдары, беренсе кәрәк-яраҡ әйберҙәр, медикаменттар. Бынан тыш, штабтың эше МХО зонаһында ҡатнашыусы хәрби хеҙмәткәрҙәр ғаиләләренә бәйле. Волонтерҙар яугирҙәрҙең туғандарына һәм яҡындарына көнкүрештә, хужалыҡ мәсьәләләрен хәл итеүҙә, психологик ярҙам күрһәтә. Шуныһы иғтибарға лайыҡ: ирекмәндәр хәрәкәтенә йәштәр ҙә йәлеп ителә. Башҡортостан халҡы һәр саҡ ярҙамсыл һәм һәр ваҡыт ярҙам итергә әҙер, – тине Максим Забелин. Штаб эш процесында ҡайһы бер ҡыйынлыҡтарға ла юлыҡҡан, ләкин бөтәһе лә оператив һәм һөҙөмтәле хәл ителә. Максим Забелин һүҙҙәренсә, штаб ағзалары – республиканың танылған шәхестәре генә түгел, йәштәр ҙә. Улар республика алып барған эштең мөһимлеген аңлай. “Шулай уҡ күп ирекмәндәр Донбассҡа гуманитар миссиялар менән йөрөй, гуманитар колонналарҙы оҙатып бара. Ялға ҡайтҡан яугирҙәрҙе ҡаршы алалар һәм оҙаталар. Хәҙер төп бурыс – йыйылған темптарҙы кәметмәү һәм ярҙамға мохтаждарға ярҙам итеүҙе дауам итеү”, – тине ул. Сара һуңында республиканың әүҙем ирекмәндәре бүләкләнде. Улар Башҡортостан Башлығы Хакимиәте етәксеһе, Башҡортостан Дәүләт Йыйылышы – Ҡоролтай Рәйесе һәм “Берҙәм Рәсәй” партияһынан Рәхмәт хаттары алды. Айрат Нурмөхәмәтов фотолары.