"Иннопром. Ҡаҙағстан" халыҡ-ара сәнәғәт күргәҙмәһе сиктәрендә Башҡортостан Республикаһы Хөкүмәте Премьер-министры Андрей Назаров һәм Ҡаҙағстан Республикаһының сәнәғәт һәм төҙөлөш министры Канат Шарлапаев Башҡортостан Республикаһы һәм Ҡаҙағстан Республикаһы Хөкүмәте араһында 2023-2024 йылдарҙа хеҙмәттәшлекте үҫтереү буйынса саралар планына ҡул ҡуйҙы. Иҫегеҙгә төшөрәбеҙ, күргәҙмә 25-27 сентябрҙә Астана ҡалаһында үтә. – Беҙҙең план сәнәғәт, иҡтисад, инвестициялар, агросәнәғәт комплексы, һаулыҡ һаҡлау һәм башҡа өлкәләрҙә хеҙмәттәшлекте үҫтереү буйынса сараларҙы үҙ эсенә ала. Мәҫәлән, “юл картаһы” сиктәрендә беҙ машина төҙөү, нефть-газ химияһы, химия сәнәғәте һәм башҡа өлкәлә берлектәге проекттарҙы тормошҡа ашырырға ниәтләйбеҙ. Ҡаҙағстанда Башҡортостандың сауҙа йортон асып, “Башҡортостан-Ҡаҙағстан оҙон ғүмерлелеге” проектын тормошҡа ашырыу буйынса эш алып барасаҡбыҙ, – тине Андрей Назаров. ”Юл картаһы” биш тематик бүлектән тора. Ул 2023-2024 йылдарға иҫәпләнгән. Алдағы йылдарҙа ике төбәк тә иҡтисади һәм инвестиция ҡеүәте менән үҙ-ара презентациялар үткәрергә, импортты алмаштырыу буйынса эште әүҙемләштерергә, сәнәғәттә, агросәнәғәт комплексында кооперация бәйләнештәрен нығытырға, һаулыҡ һаҡлау өлкәһендә хеҙмәттәшлек итергә, эске туризмды үҫтерергә планлаштыра. Ҡаҙағстан Республикаһының сәнәғәт һәм төҙөлөш министры Канат Шарлапаев ике республиканың мәҙәниәттәре, телдәре һәм менталитеты оҡшашлығын билдәләне, йыл һайын үткәрелгән осрашыуҙарҙы изге йолаға әйләндерергә теләк белдерҙе һәм Башҡортостан Республикаһы "Иннопром. Ҡаҙағстан" сәнәғәт күргәҙмәһендә әүҙем ҡатнашҡаны өсөн рәхмәт белдерҙе. Андрей Назаров билдәләүенсә, Башҡортостан делегацияһы составындағы бөтә эшҡыуарҙар яҡшы һөҙөмтәләр, килешеүҙәр менән өйҙәренә ҡайтасаҡ. ”Юл картаһы” бөтә пункттар буйынса эшләй, ә Ҡаҙағстан берлектәге проекттар һаны һәм мөнәсәбәттәрҙе үҫтереү темптары буйынса Башҡортостандың төп партнеры булып тора. Премьер-министр Ҡаҙағстан делегацияһын 2023 йылдың ноябрендә Өфөлә үтәсәк халыҡ-ара бизнес аҙналығына саҡырҙы. Фото: pravitelstvorb.ru