Судьяларға маҡтаулы исемдәр тапшырылды

22 сентябрҙә Башҡортостан Республикаһы Хөкүмәте Премьер-министры Андрей Назаров Башҡортостан Республикаһы Юғары Судының 100 йыллығына арналған тантаналы сарала ҡатнашты. Андрей Назаров үҙенең ҡотлау телмәрендә берҙәм суд практикаһын формалаштырыуҙа Башҡортостан Юғары Судының төп ролен, уның төп, мөһим суд реформаларын алға этәреүҙә әүҙем ҡатнашыуын билдәләне. Республика фемидаһының төп учреждениеһы тарихында республика һәм ил осраған бөтә ваҡиғалар сағылыш тапҡан, тип билдәләне Премьер-министр. Мәҫәлән, XVII быуат аҙағында батша Рәсәйенең уставтары һәм шәриғәт закондары нигеҙендә эшләгән административ һәм суд власының уникаль симбиозы барлыҡҡа килә. XVIII быуат башында ғына 1782 йылғы батша указына ярашлы енәйәт һәм гражданлыҡ судтары палаталары булдырыла. 1923 йылда нигеҙ һалынғандан алып БАССР-ҙың Юғары Суды ҡатмарлы сәйәси һәм тарихи шарттарҙа дәүләт төҙөлөшө процестарында әүҙем ҡатнаша. Ә Бөйөк Ватан һуғышы башланыу менән судьялар корпусының күпселек өлөшө мантияларын гимнастеркаларға алмаштыра. – Шундайҙарҙың береһе Батырлыҡ һәм ҡаһарманлыҡ өсөн миҙалдар һәм ордендар менән бүләкләнгән Шакир Ҡазыхан улы Вәхитов була. Һуңынан ул 27 йыл дауамында Юғары Судҡа етәкселек итә. Тап элекке фронтовиктар суд системаһына намыҫһыҙлыҡҡа һәм ике йөҙлөлөккә түҙеп торғоһоҙ рух, тормош ғәҙеллегенә ҡаршы көрәш тойғоһо индерҙе, - тип һыҙыҡ өҫтөнә алды Андрей Назаров. Хөкүмәт Рәйесе 90-сы йылдар башында хоҡуҡи системаны үҙгәртеүҙең ҡатмарлы осорон иҫкә төшөрҙө, ул саҡта судья һөнәре юридик оҫталыҡ һәм тәжрибә генә түгел, ә юғары әхлаҡи сифаттар, закон рухына эйәреү һәләтен талап итте. Башҡортостандың Юғары Суды процессуаль ҡануниәтте формалаштырыуҙың ҡатмарлы этабының турбулентлығын уңышлы үтеп сыҡты, тип билдәләне ул. – Юғары Суд органында ҡаралған эштәр һаны йыл һайын бер нисә меңгә арта. Сағыштырыу өсөн: 2020 йылда 26 350 эш һәм 2023 йылдың I ярты йыллығында ғына 15 193 эш. Был мәғлүмәттәр республика халҡының судтарға ышаныс кимәле юғары булыуын күрһәтә. Беҙҙә үҙ бурысына һәм фемидаға хеҙмәт итеүгә тоғро профессионалдарҙан торған көслө судьялар корпусы барлыҡҡа килде. Һеҙ бөтә ғүмерегеҙҙе закон һәм ғәҙеллек тантанаһына бағышланығыҙ. Ошоноң арҡаһында Башҡортостан ғәҙәттәгесә ғәҙеллек сифаты буйынса Рәсәйҙең иң яҡшы төбәктәре иҫәбенә инә, — тине Премьер-министр. Андрей Назаров граждандарҙың социаль яҡланмаған категорияларын яҡлауҙы тәьмин итеүҙә һәм махсус хәрби операцияла ҡатнашыусылар менән бәйле мәсьәләләрҙе хәл итеүҙә судтың ҡаҙаныштарын айырыуса билдәләне. Сара йомғаҡтары буйынса Башҡортостан Хөкүмәте Премьер-министры тармаҡтың иң яҡшы вәкилдәрен дәүләт һәм ведомство наградалары менән бүләкләне. Башҡортостан Республикаһы Башлығы указы менән Башҡортостан Республикаһында Суд департаменты идаралығы начальнигы Фәрит Хәмит улы Фазыловҡа Салауат Юлаев ордены тапшырылды. Бер төркөм Башҡортостан Республикаһы Юғары Суды судьяларына – Наталья Александровна Александроваға, Василий Владиславович Белоярцевҡа, Асҡар Абдулнасир улы Дашкинға, Фәйез Фәрүәз улы Ҡасҡынбаевҡа, Зәлиә Ғарфетдин ҡыҙы Латиповаға, Зөлфиә Әлтәф ҡыҙы Нәүширбановаға “Башҡортостан Республикаһының атҡаҙанған юрисы" тигән маҡтаулы исем бирелде. Шулай уҡ Башҡортостан Юғары Судының отставкалағы судьяларына – Галина Федоровна Васильеваға, Марина Юрьевна Хомечкоға, Дөйөм юрисдикциялы алтынсы кассация суды судьяһы Зәкәриә Әнүәр улы Ваһаповҡа, Өфө ҡалаһының Совет район суды рәйесе Рөстәм Рәйес улы Ғәйнетдиновҡа, Өфө ҡалаһының Совет район судының отставкалағы рәйесе Азат Зәки улы Муллануровҡа “Башҡортостан Республикаһының атҡаҙанған юрисы" тигән маҡтаулы исем бирелде. Башҡортостан Республикаһы Хөкүмәте бойороғо менән суд системаһын үҫтереүгә ҙур өлөш индергәне, ғәҙеллекте нығытыуға булышлыҡ иткәне һәм Башҡортостан Республикаһы Юғары Судының 100 йыллыҡ юбилейын байрам итеүгә бәйле Башҡортостан Республикаһы Хөкүмәтенең Почет грамотаһы менән Рәсәй Федерацияһы Юғары Суды ҡарамағындағы Суд департаментының генераль директоры урынбаҫары Юрий Михайлович Органов, Рәсәй Федерацияһы Юғары Суды судьяһы Александр Сергеевич-Червоткин бүләкләнде. Фото: http://vs.bkr.sudrf.ru