”Йәдкәр” фольклор ансамбле менән барып, Йәдкәр ҡыҙын алдым...

Бөгөн Рәсәй Федерацияһының атҡаҙанған артисы, Башҡортостандың халыҡ артисы Рәмил Ғәйзуллиндың тыуған көнө. Ул 1987 йылдан Хөсәйен Әхмәтов исемендәге Башҡорт дәүләт филармонияһында эшләй, әле – солист. Уның тырышлығы менән Милли халыҡ уйын ҡоралдары оркестры ойошторола, 2001 йылдан – художество етәксеһе, артабан директоры була. Рәмил Ғәйзуллин бер үк ваҡытта бер нисә музыка ҡоралында уйнай: ҡумыҙ, хайран, дуплфуруй (венгрҙарҙың ике ҡатлы флейтаһы), чоор (ҡырғыҙҙарҙың буй флейтаһы), һыбыҙғы (татар флейтаһы). Шуға ла уны "Оркестр-кеше" тип йөрөтәләр. Рәмил Мәүлит улының балалары ла музыкаль белем алған. – Ҡатыным Ирина Йәдкәр ҡыҙы менән оҙаҡ йылдар йәшәйбеҙ. Минең кәләш алыуҙа Ғәли Хәмзиндың да өлөшө бар. Улар менән гастролгә Ишморат Илбәков барырға тейеш булған, әммә ул бара алмаған. Өс көн ҡалғас, мине өгөтләп алып киттеләр. Ҡаҙағстандың Аҡтау тигән ҡалаһында беҙҙе Башҡоррт үҙәге вәкилдәре ҡаршы алды. Улар араһында бер ҡыҙ ҙа бар ине. Шл саҡта беҙ таныштыҡ. Йәғни ”Йәдкәр” фольклор ансамбле менән барып, Йәдкәр ҡыҙын алдым. Минең дүрт улым бар: Руслан, Айтуған, Шамил, Иҡсан. Беренсе улым Руслан Хабаровск крайында тыуҙы һәм шунда йәшәй. Ул үҙенең эше менән шөғөлләнә, сәнғәттә түгел. Ҡалған өс улым Өфөлә үҫте. Айтуған менән бала саҡтан шөғөлләнеп, уға “Урал”, “Ильяс” кеүек оҙон көйҙәрҙе өйрәттем. Уртансы улым Шамил да унан отоп ултыра торғайны, шуға ла уны йырларға өйрәтеүе еңелерәк булды. Улар өсөһө лә музыка мәктәбен тамамланы. Айтуған йыр буйынса уҡыны. Шамил һуғып уйнаусыға (ударникка) уҡыны, аҙаҡтан менеджер һөнәрен үҙләштерҙе. Иҡсан да һуғып уйнаусы һәм әле ошо һөнәре буйынса эшләй. Ғөмүмән, улдарым музыка юлын һайланы һәм был улар өсөн икмәк-тоҙ булып тора. Миңә: “Ниңә балаларыңды артислыҡҡа бирәһең, унда аҡса әҙ”, – тип әйткән кешеләр ҙә булды. Был фекер дөрөҫ түгел ул. Эшләй белһәң, аҡсаһын да, бөтөн әйберҙе лә табырға була. Ул үҙеңдән тора. Артист кеше ирекле ҡош кеүек булырға тейеш. Дәүләт учреждениеһында эшләһәң дә, ирекле ижадҡа ваҡыт ҡалдырылһа, ул саҡта бөтөн уйлаған эштәрең дә килеп сыға. Мине төрлө яҡҡа сығыш яһарға саҡыралар, тимәк, ижадыма ихтыяж бар. Улдарым да үҙҙәренә юл ярып бара, эш хаҡына ғына өмөтләнеп, көтөп ултырмай, - тип уртаҡлашты ул. Рәмил Ғәйзуллинды тыуған көнө менән ҡотлайбыҙ, ижади уңыштар, ғаилә именлеге теләйбеҙ. Фото: Рәмил Ғәйзуллиндың ғаилә архивынан.