Айгөл Сурина – Хәйбулланың Бәләкәй Арыҫланғол ауылы ҡыҙы. Тыуған районында белем алғандан һуң Өфө ҡалаһына юлланып, тәрбиәсе һөнәренә уҡый. Унан Хәйбуллаға ҡайта, кейәүгә сыға. Дүрт балаға ғүмер бирәләр – Буранбай, Сыңғыҙ, Ғәзиз, Сәлимә. “Айгөл Шәйхислам ҡыҙы – бөтөн яҡлап уңған кеше. Эштә лә, ғаиләһендә лә һоҡланғыс өлгө күрһәтеп, ауылдаштарын алға әйҙәп йәшәй ул, – ти “Йәйғор” балалар баҡсаһы мөдире Гөлнара Мөхәмәтйәрова. – Шул ҡәҙәр уңған ғаилә. Ауылдаштарын айыҡ тормошҡа әйҙәү йәһәтенән бихисап эш алып баралар. Спорт һөйәләр. Айгөл Шәйхислам ҡыҙы төрлө ярыштарҙа алдынғылыҡты бирмәй, уңыштар яулап тора. Уңған ғаилә күп итеп умарта тота, таҡта ярыу цехтары бар. Ауылдаштарыбыҙ, шулай уҡ эргә-тирәлә йәшәгәндәр байрамдарға Айгөл Шәйхислам ҡыҙынан буҙа ла эшләтеп ала. Хеҙмәттәшебеҙҙең йорт-ихатаһы “көлөп” тора, йыл да төрлө сағыу сәскәләргә күмелә”. Гөлнара Мөхәмәтйәрова Айгөл Шәйхислам ҡыҙының балалар баҡсаһындағы эшмәкәрлеген дә юғары баһалай. “Кескәйҙәр күңелендә милли рух тәрбиәләүгә, уларҙы бәләкәйҙән үк әүҙем булырға өйрәтә ул. Ошо маҡсатта төрлө конкурстарҙа ҡатнаштыра, һәләттәрен асыуға ҙур иғтибар бирә. Шуға ла атай-әсәйҙәр ҙә Айгөл Шәйхислам ҡыҙына ул-ҡыҙҙарын ышанып тапшыра, уны ихтирам итә, сикһеҙ рәхмәтле. Баланы яратһаң, тормош үҙеңә "йылмайыр", киләсәк яҡты булыр - ошо хәҡиҡәтте онотмайынса, эшкә бөтөн күңелебеҙҙе һалабыҙ”, – ти мөдир. "Башҡортостан" гәзитенең "Бәйләнештә"ге төркөмөндә конкурсанттарыбыҙ өсөн тауыш бирергә саҡырабыҙ. Иртәгә бәйгегә йомғаҡ яһаласаҡ. Фотолар А. Суринаның сәхифәһенән алынды.