Башҡортостан делегацияһы халыҡ- ара күргәҙмәлә ҡатнаша

25 – 27 сентябрҙә Ҡаҙағстандың Астана ҡалаһында “Иннопром. Ҡаҙағстан” халыҡ-ара сәнәғәт күргәҙмәһе уҙасаҡ. Унда Башҡортостан Хөкүмәте Премьер-министры Андрей Назаров етәкселегендәге Башҡортостан Республикаһының рәсми делегацияһы ҡатнашасаҡ. Бөгөн делегация Ҡаҙағстандың баш ҡалаһына килде. Астана аэропортында делегацияны Ҡаҙағстандың сәнәғәт һәм төҙөлөш министры Иран Шархан, Ҡаҙағстан Транспорт министрлығының Граждандар авиацияһы комитеты рәйесе Тәлғәт Ластаев, Ҡаҙағстандың Транспорт министрлығының Граждандар авиацияһы комитеты рәйесе урынбаҫары Тимур Тлегенов һәм "Казаэронавигация" вәкиле Гөлсим Әсәнҡолова ҡаршы алды. Рәсми делегация составына 18 ҙур предприятие, 30 бәләкәй һәм урта бизнес субъекты вәкилдәре, шулай уҡ республика ведомстволары вәкилдәре инә, тип хәбәр иттеләр Башҡортостан Хөкүмәтенең матбуғат хеҙмәтенән. «Иннопром»да һәр компания бизнес-диалог сиктәрендә кәмендә биш осрашыу үткәрәсәк. Ул күргәҙмәнең төп маҡсатын билдәләй: ике ил эшҡыуарҙары араһында партнерлыҡ мөнәсәбәттәрен киңәйтеү. Бынан тыш, Башҡортостандан ҡатнашыусылар Ҡаҙағстан предприятиеларында буласаҡ, урындағы производство менән танышасаҡ һәм Ҡаҙағстандағы хеҙмәттәштәре менән тәжрибә уртаҡлашасаҡ. Башҡортостандың рәсми делегацияһы «Яңы ваҡыттың сәнәғәт стратегиялары» пленар сессияһында, «Рәсәй – Ҡаҙағстан араһында тышҡы иҡтисади эшмәкәрлек һәм инвестициялар өлкәһендә хеҙмәттәшлек: яңы векторҙар» түңәрәк өҫтәлендә, шулай уҡ Ҡаҙағстандың сәнәғәт һәм төҙөлөш министры Канат Шарлапаев менән осрашыуҙа ҡатнашасаҡ. «Иннопром»да Башҡортостан менән Ҡаҙағстан араһында хеҙмәттәшлек тураһында бер нисә килешеүгә, шул иҫәптән 2023 - 2024 йылдарға хеҙмәттәшлекте үҫтереү буйынса «юл картаһына» һәм Башҡортостан, Ҡаҙағстан һәм Беларусь хөкүмәттәре араһында «Башҡортостан-Ҡаҙағстан-Беларусь оҙон ғүмерлелеге. Туризм» проектын тормошҡа ашырыу буйынса меморандумға ҡул ҡуйыу планлаштырыла. Фото: Башҡортостан Хөкүмәтенең матбуғат хеҙмәте.