22-24 сентябрҙә Стәрлетамаҡ ҡалаһында мәктәп һәм студенттар араһында ирекмәнлекте үҫтереүгә йүнәлтелгән «Алға, Еңеүгә» («ВПеред к Победам») Бөтә Рәсәй патриотик форумы үтте. Форумды ойоштороусылар - «Беренселәр хәрәкәте» Рәсәй йәмәғәт-дәүләт балалар һәм йәштәр хәрәкәтенең Стәрлетамаҡ ҡалаһындағы бүлексәһе һәм А.П.Гайдар исемендәге Пионерҙар һәм уҡыусылар һарайы. Форум офлайн һәм онлайн форматта үтте, Рәсәйҙең төрлө мөйөштәренән ике меңдән ашыу ҡатнашыусыны берләштерҙе. Офлайн майҙанда «Мин - патриот, ә был, тимәк...» республика социаль проекттар конкурсында ҡатнашыусылары һәм финалсылары ҡатнашты. Онлайн-майҙансыҡтарҙа Рәсәй Федерацияһы субъекттарында ирекмәнлек эшмәкәрлеге алып барған мәктәп һәм студенттар патриотик йүнәлештәге командалары ҡатнашты. Форумда абруйлы ҡунаҡтар ҡатнашты: Башҡортостан Башлығы советнигы, «Беренселәр хәрәкәте» төбәк бүлексәһе советы рәйесе Рәнис Хәсәнов; Стәрлетамаҡ ҡалаһы хакимиәте башлығы Рөстәм Ғәзизов, Мәскәү ҡалаһы «Еңеү ирекмәндәре» Бөтә Рәсәй йәмәғәт хәрәкәтенең «Бөйөк Еңеү» йүнәлеше етәксеһе Эдуард Алистратов. «Форум донъяны яҡшыраҡ итеү һәм илебеҙҙең бөйөк еңеүен дауам итеү кеүек маҡсат ҡуйған йәштәрҙе берләштерҙе. Өс көн дауамында сарала ҡатнашыусылар йәмғиәттә ирекмәнлек һәм илһөйәрлек эшенең мөһимлеген тикшерҙе. Форум ҡатнашыусыларға тәжрибә, идеялар һәм проекттар менән алмашыу майҙансығы булды. Ул йәштәрҙе артабанғы хеҙмәттәшлеккә һәм ирекмәндәр хәрәкәтендә әүҙем ҡатнашырға илһамландырҙы», - тине Рәнис Хәсәнов. Форумдың тәүге көнөндә йәштәр нетворкингта, саҡырылған ҡунаҡтар ҡатнашлығында тиң һөйләшеүҙә, Эдуард Алистратовтың «Шәхси волонтер бренды» оҫталыҡ дәресендә һәм Стәрлетамаҡ шихандарына экскурсияла булды. Шулай уҡ форумда ҡатнашыусылар тантаналы ваҡиғаның - «Беренселәр аллеяһы»на нигеҙ һалыуҙың шаһиты булды. Акция сиктәрендә ҡаланың Ю.А. Гагарин исемендәге мәҙәниәт һәм ял паркында 60 каштан үҫентеһе ултыртылды. Икенсе көндө балалар махсус хәрби операцияла ҡатнашыусылар менән осрашты, бизнес-симуляция һәм социаль проектлау буйынса интерактив уйында көсөн һынаны. Патриотик йүнәлештәге социаль проекттарҙы яҡлау һәм федераль эксперттарҙан консультация алыу мөмкинлеге иң көтөп алынған сараларҙың береһе булды. Лекциялар барышында балалар нисек патриотик клуб ойоштороу һәм Башҡортостандың эҙәрмәндәр отрядтары тураһында белде. Фото: форумдың социаль селтәрҙәге рәсми төркөмөнән.