Рөстәм Миңнеханов ТР Хөкүмәте йортындагы киңәшмәдә татарстанлыларны грипп һәм ОРВИ белән авыруны кисәтү максатыннан профилактика чараларын үтәргә чакырды.
"Профилактиканың төп формаларының берсе - вакцинация. Республика гриппка каршы 824 мең доза вакцина белән тәэмин ителгән. Авыручылар арту сәбәпле, вакцинация белән республика халкының 60 процентка якынын колачларга кирәк. Бүгенге көндә 573 мең кеше вакцинацияләнде», - дип билгеләп үтте Рәис.
Көз җитү белән республикада кискен рәвештә респиратор вируслы инфекцияләр һәм грипп белән авыручыларның сезонлы артуы күзәтелә. Соңгы атнада әлеге күрсәткеч 46% ка арткан - 14 мең 215 очрак. Короновирус белән авыручылар саны да арткан - бер атна эчендә 89 очрак теркәлгән. Алдагы атнада 65 очрак булган - 37% үсеш. Әлегә ОРВИ авырулары, шул исәптән яңа коронавирус инфекциясе белән чирләүләр җиңел формада уза.