Башҡортостан торлаҡ төҙөлөшө күләме буйынса алдынғы ун төбәк иҫәбенә инә

Башҡортостан торлаҡ төҙөлөшө күләме буйынса алдынғы ун төбәк иҫәбенә инә. Был хаҡта Рәсәй Федерацияһының төҙөлөш һәм торлаҡ-коммуналь хужалыҡ министры урынбаҫары Никита Стасишин төбәккә эш сәфәре барышында һөйләне. Командировка сиктәрендә «Көнсығыш сығыу юлын» ҡарау, Өфө ҡалаһы ҡала округының «Ағиҙел аръяғы» һәм «Ҡариҙел аоъяғы» төҙөлөш райондары менән танышыу, шулай уҡ Башҡортостан Республикаһы Төҙөүселәр ассоциацияһының күсмә ултырышы үтте. Министр урынбаҫары әйтеүенсә, әлеге ваҡытта Башҡортостан Республикаһында субъект мәғлүмәттәре буйынса дөйөм майҙаны 3,6 миллион квадрат метрҙан ашыу торлаҡ төҙөүгә 386 рөхсәт ғәмәлдә. "Беҙ Рәсәйҙең Төҙөлөш министрлығы менән бик һөҙөмтәле хеҙмәттәшлек булдыра алдыҡ. Башҡортостан торлаҡ төҙөлөшө һәм коммуналь хужалыҡ өлкәһендәге мәсьәләләрҙе хәл итеү өсөн байтаҡ финанс инструменттар, инфраструктура менюһы алды. Был линия буйынса беҙ 60 миллиард һум самаһы аҡса йәлеп иттек. Беҙ шулай уҡ иң мөһим инструмент территорияларҙы комплекслы үҫтереү икәнен аңлайбыҙ. Һәм был йәһәттән төҙөүселәр менән әүҙем эшләй башланыҡ», — тине Башҡортостан Республикаһы Башлығы Радий Хәбиров. Никита Стасишин «Көнсығыш сығыу юлы» — Өфөнән Мәскәү менән Силәбене тоташтырыусы «Урал» М-5 федераль трассаһына һәм Башҡортостан Республикаһының ғына түгел, Рәсәйҙең транспорт системаһында уникаль капиталь төҙөлөш объектына барҙы. Сығыу юлының дөйөм оҙонлоғо 13,9 километр тәшкил итә, шуларҙың 1,2 километрҙан ашыуы - Урмансылар паркы аҫтындағы тоннель һәм 2,65 километры - Ҡариҙел йылғаһы аша эстакадалы күпер. Әлеге ваҡытта төҙөлөшкә 2220 кеше һәм 260 берәмек махсус техника һәм ҡорамалдар йәлеп ителгән. Был проект концессия килешеүе сиктәрендә тормошҡа ашырыла һәм республиканың транспорт-логистика ҡеүәтен үҫтереү, Өфө аръяғы биләмәһендә Өфө агломерацияһын үҫтереү, заманса транспорт инфраструктураһын, яңы эш урындарын һәм уңайлы инвестиция мөхитен булдырыу өсөн ҙур әһәмиәткә эйә. Әлеге ваҡытта инфраструктура объекты юғары әҙерлек кимәлендә, уны йыл аҙағына тиклем асыу планлаштырыла. Шулай уҡ яңы һәм перспективалы төҙөлөш биләмәләре - «Ағиҙел аръяғы», «Ҡариҙел аръяғы», «Көньяҡ ҡапҡа» - тикшерелде. Торлаҡтың дөйөм перспективалы күләме 30 миллион квадрат метрҙан ашыу тәшкил итә. Инфраструктура менән был райондарҙы үҫтереү федераль ярҙам менән дә тормошҡа ашырыла. Ағиҙел аръяғы-1 биләмәһендә һыу менән тәьмин итеү һәм һыуҙы ағыҙыу системаһы менән инженер тәьминәте торлаҡ төҙөлөшөн дәртләндереү программаһы буйынса федераль аҡсаға тормошҡа ашырыла, ул “Торлаҡ һәм ҡала мөхите” милли проектына инә. Өфө ҡалаһының «Көньяҡ ҡапҡаһы» комплекслы торлаҡ төҙөлөшө проекты сиктәрендә инфраструктура бюджет кредиттары иҫәбенә 2023 йылда биш юл-транспорт инфраструктураһы объекты һәм 2200 урынлыҡ бер дөйөм белем биреү мәктәбе төҙөлә. Сығанаҡ: minstroyrf.gov.ru