«Халыҡ-ара кооперация һәм экспорт» милли проектын тормошҡа ашырыу өсөн Башҡортостан Республикаһының Беларусь Республикаһындағы Сауҙа вәкиллеге ҡарамағындағы вәкиле Константин Климин «Санта Бремор» (аҙыҡ-түлек етештереү), «Савушкин продукт» асыҡ акционерҙар йәмғиәте (аҙыҡ-түлек етештереү), 1AK-GROUP холдингының идарасы компанияһы (аккумулятор батареялары етештереү һәм һатыу) һәм Беларусь Республикаһының «Аккумулятор альянсы» яуаплылығы сикләнгән йәмғиәте (аккумулятор батареялары етештереү һәм һатыу) менән һөйләшеүҙәр үткәрҙе. Башҡортостан Республикаһының тышҡы иҡтисади бәйләнештәр һәм конгресс эшмәкәрлеге министры Маргарита Болычева: - Ағымдағы йылдың ете айы йомғаҡтары буйынса алты процентҡа артҡан Башҡортостан - Беларусь тауар әйләнеше беҙҙең хеҙмәттәшлектең ҙур перспективалары тураһында дәлилләй. Беларусь Республикаһында химия сәнәғәте продукцияһы, металдар, аҙыҡ-түлек тауарҙары һәм машиналар эшләү продукцияһы ҙур һорау менән файҙалана. Башҡортостан, үҙ сиратында, инвесторҙар өсөн яҡшы шарттар тыуҙыра, - тине. Әйтергә кәрәк, Башҡортостан менән Беларусь ҡалалары һәм райондары тығыҙ хеҙмәттәшлек итә. Атап әйткәндә, Өфө һәм Минск 2017 йылдан туғандаш ҡалалар булып тора һәм байтаҡ берлектәге проекттарҙы тормошҡа ашыра. Башҡортостан Республикаһының Бөрө районы һәм Гродно өлкәһенең Волковысск районы ла 2023 йылда туғанлашты. Сығанаҡ: https://pravitelstvorb.ru/news/21898/