Константин Толкачев – етенсе саҡырылыш Дәүләт Йыйылышы – Ҡоролтай Рәйесе

Константин Толкачев кандидатураһын Дәүләт Йыйылышының беренсе ултырышын әҙерләү һәм үткәреү буйынса ойоштороу комитеты тәҡдим итте. Башланғыс “Берҙәм Рәсәй” партияһы фракцияһынан килде. Депутаттар Константин Толкачевты бер тауыштан һайланы. Дәүләт Йыйылышы Рәйесе коллегаларына күрһәткән ышаныс өсөн рәхмәт әйтте һәм юғары закондар сығарыу һәм вәкиллекле орган рәйесенә парламент эшен ойоштороу һәм төрлө кимәлдәге дәүләт власы органдары, йәмәғәт берләшмәләре менән һөҙөмтәле үҙ-ара эш итеүҙе тәьмин итеү өсөн ҙур яуаплылыҡ йөкмәтелеүен билдәләне. – Миңә йөкмәтелгән вәкәләттәрҙе тормошҡа ашырыу өсөн бөтә һөнәри тәжрибәмде һәм белемемде һалырға вәғәҙә бирәм, – тине Константин Толкачев. – Үткән саҡырылыш Дәүләт Йыйылышы – Ҡоролтай депутаттарына һөҙөмтәле закондар сығарыу эшмәкәрлеге өсөн рәхмәт белдерәм. Уларҙың профессионализмы, әүҙемлеге, һайлаусыларға ҡарата иғтибарлылығы йәмғиәттең көнүҙәк проблемаларын ваҡытында асыҡларға һәм хәл итергә мөмкинлек бирҙе. Үткән йылдарҙа эшмәкәрлектең бөтә өлкәләрендә лә заман талаптарын иҫәпкә алып, етди үҙгәртеп ҡороуҙар өсөн нигеҙ һалынды. Депутаттар корпусының яңы составы ошо башланғыстарҙы дауам итер һәм Башҡортостандың иҡтисади һәм интеллектуаль ҡеүәте артабан да республика халҡы мәнфәғәтендә үҫешһен өсөн барыһын да эшләр, тип ышанам. Беҙҙең саҡырылыш осоронда һеҙҙең ярҙамығыҙға иҫәп тотам. Үҙ сиратымда һәр берегеҙ менән конструктив әңгәмәгә һәр ваҡыт әҙермен. Тағы ла бер тапҡыр ышаныс күрһәткәнегеҙ өсөн рәхмәт. Социаль сәйәсәт өлкәһендәге бурыстар тураһында һөйләгәндә, парламент спикеры махсус хәрби операцияла ҡатнашыусыларға, уларҙың туғандарына һәм яҡындарына ярҙам итеү буйынса эштең мөһимлеген билдәләне. Закондар сығарыу эшмәкәрлегендә төп стратегик йүнәлештәр иҫәбендә халыҡ һанының тотороҡло үҫеүен тәьмин итеү, ғүмер оҙайлығын арттырыу, ғаиләләрҙең торлаҡ шарттарын яҡшыртыу, граждандарҙың реаль килемен арттырыу тора. – Дәүләт Йыйылышы эшенең төп йүнәлештәре республиканың стратегик үҫеш йүнәлештәре менән тап килә, – тине Константин Толкачев. – Был инвестициялар йәлеп итеү, эш урындары булдырыу, яңы производстволарҙы үҫтереү, ауыл хужалығына ярҙам итеү юлы менән төбәктең иҡтисади үҫешен дәртләндереү. Шулай уҡ халыҡҡа социаль ярҙам системаһын камиллаштырыу тора. Һайланған курс дауам ителәсәк. Константин Толкачев маҡсаттарҙы тормошҡа ашырыу өсөн депутаттарҙы берләшергә саҡырҙы. – Һеҙҙең һәр берегеҙ – һиҙелерлек уңыштарға өлгәшкән профессионал, - тине Дәүләт Йыйылышы Рәйесе. – Беҙ төрлө сәйәси көстәрҙе сағылдырабыҙ. Һәр кемдең, тупланған тәжрибә һәм компетенцияларҙан сығып, тирә-яғыбыҙҙағы тормошто яҡшы яҡҡа үҙгәртеү тураһында үҙ ҡарашы, үҙ стратегияһы һәм эш ысулдары бар. Әммә алдағы биш йылда беҙ дәүләт бурыстарын хәл итеү өсөн берләшергә бурыслыбыҙ. Әгәр беҙ берҙәм булһаҡ, теләһә ниндәй һынауҙарҙы үтәсәкбеҙ һәм мотлаҡ уңышҡа өлгәшәсәкбеҙ. Константин Толкачев республика парламентын алтынсы тапҡыр етәкләй. Быға тиклем ул Башҡортостан Республикаһының икенсе, өсөнсө, дүртенсе, бишенсе һәм алтынсы саҡырылыш Дәүләт Йыйылышы – Ҡоролтай депутаты итеп һайланғайны. Фото: Олег Яровиков.