”Минең улым ҡайтып килмәйме икән?”

Зөлфиә Сәғетдинованың һәр көнө бер йыл элек махсус хәрби операция зонаһына киткән улын көтөп үтә... Әсәнең алғы һыҙыҡтағы улы хаҡында уйламаған, уның нисек өйгә ҡайтып инеүен, нисек осрашыуҙарын күҙ алдына килтермәгән минуты юҡ. Зөлфиә Сәғетдинова - ауыр ауыл хеҙмәтенән ҡурҡмай, бик күп йылдар һауынсы булып эшләгән кеше. Үҙенең дүрт балаһы эргәһенә етем ҡалған туғанын да һыйындыра. Әсә 2022 йылдың сентябренән һуң ғаиләһенең тормошо нисек үҙгәреүе тураһында “Стәрлебаш шишмәләре” хәбәрселәренә һөйләгән. Хаҡлы ялға сыҡҡас, ейәндәренә күберәк ваҡыт бүлә һәм интернет киңлектәрен үҙләштерә башлаған. Улының фотоларын ҡарамаған көнө юҡ уның. –Беҙ улым менән видеобәйләнеш аша аралашабыҙ. Ул яңыраҡ үҙҙәренә Башҡортостандан ҡунаҡтар килеүе, концерт ойоштороуҙары, былау менән һыйлауҙары тураһында һөйләне. Бер ваҡыт та зарланғаны юҡ. Гел мине “барыһы ла һәйбәт”, тип тынысландыра.”Әсәй, борсолма, ашау яҡшы, барыһы ла бар. Үҙебеҙ әҙерләйбеҙ. Быҡтырылған ит ашай-ашай арыныҡ хатта, һинең ашты тәмләге килә, һағындырҙы”, - ти. Посылкалар өсөн рәхмәт әйтә, башҡа бер ни ҙә кәрәкмәй, ти, – тип әсә уның менән ниндәй яңылыҡтар менән уртаҡлашҡанын һөйләй. Илдус Хәлекәй ауылында тыуып үҫкән, ошонда уҡыған. Хәрби комиссариаттан саҡырыу килеү менән юлға йыйынған. Сит ерҙә ауыл егетенең үткер күҙе бойҙай баҫыуҙарына, виноград биләмәләренә төшә, абрикос ағасының нисек сәскә атыуы һоҡландыра, яҙҙың иртә килеүе ғәжәпләндерә... Донбастағы тыныс тормош күренештәрен фотоға төшөрөп, йыш ҡына ғаиләһенә ебәрә. Туғандары ла егетте ауыл яңылыҡтары менән таныштырып тора, мәҫәлән, кемдер ғаилә ҡорған, сабый тыуған, һыйыр быҙаулаған – бөткәнме ни шатлыҡлы хәбәрҙәр! Илдустың тыуған яҡҡа әйләнеп ҡайтыуын бөтә туғандары түҙемһеҙлек менән көтә. Әсәһе Зөлфиә ҡапҡа эргәһенән үткән һәр машинаны күҙ ҡарашы менән оҙатып ҡала: ”Минең улым ҡайтып килмәйме икән?” Бөгөн өмөтө аҡланмағанын аңлаһа ла, әсәнең ниәте ныҡ: ”Күпме кәрәк – шунса көтәсәкбеҙ! Еңеү менән, иҫән-һау ҡайтығыҙ!” Рәйлә Тайғонова фотоһы.