ЮНЕСКО мәктәптәре вәкилдәре кәңәш ҡорҙо

Өфөлә “Төбәкте тотороҡло үҫтереү шарты булараҡ Башҡортостан Республикаһында тел сәйәсәте” төбәк-ара (халыҡ-ара ҡатнашлыҡта) фәнни-ғәмәли конференцияһы үтеүе тураһында хәбәр иткәйнек. Белеүебеҙсә, ул “Минең туған телем” программаһының Рәсәйҙең аҫаба халыҡтарының телдәрен һаҡлау буйынса комплекслы саралар планына ярашлы уҙғарылды. Бөгөн, сараның икенсе көнөндә, ЮНЕСКО-ның Башҡортостандағы ассоциацияланған мәктәптәренең Координация советы ултырышы үтте. Кәңәшмәлә ҡатнашыусыларҙы ЮНЕСКО эштәре буйынса Башҡортостан Республикаһы комитетының башҡарма директоры Элина Ғатауллина сәләмләне. Элина Винер ҡыҙы ЮНЕСКО-ның Башҡортостандағы ассоциацияланған мәктәптәренең 2023/24 уҡыу йылына билдәләгән саралары һәм проекттары, ғөмүмән, республикала ЮНЕСКО менән бәйле алып барылған эштәр, сит дәүләттәр менән хеҙмәттәшлек тураһында һөйләне. - Башҡортостан Республикаһында ЮНЕСКО-ның 39 ассоциацияланған мәктәбе эшләп килә. Ошондай ҡатмарлы заманда ла беҙ халыҡ-ара бәйләнештәрҙе нығытыуға үҙ өлөшөбөҙҙө индерәбеҙ. Күптән түгел Өфөләге 71-се мәктәп Ҡытайҙағы мәктәп менән хеҙмәттәшлеккә юл асып, тотош делегация менән барып ҡайтты. Улар сит ил уҡыусыларын беҙҙең мәҙәниәтебеҙ менән таныштырыуға ла өлгәштеләр. Киләсәктә ошоноң ише бәйләнештәр тағы артыр, тип ышанабыҙ, - тине Элина Ғатауллина. Сарала шулай уҡ Башҡортостан Республикаһының мәҙәниәт министрының беренсе урынбаҫары Наталья Лапшина, ЮНЕСКО-ның “Бөтәһе өсөн мәғлүмәт” программаһының Рәсәй комитеты рәйесе, Китапхана хеҙмәттәшлегенең төбәк-ара үҙәгенең генераль директоры, педагогия фәндәре кандидаты Сергей Бакейкин, ЮНЕСКО-ның Башҡортостандағы ассоциацияланған мәктәптәре селтәренең координаторы Тәнзилә Ниғмәтуллина һәм башҡалар сығыш яһаны. Телмәр тотоусылар ЮНЕСКО мәктәптәре алып барған эштәргә юғары баһа бирҙе. - Беҙ ЮНЕСКО-ға бәйле эшмәкәрлекте 2011 йылда башлап ебәргәйнек. 2014 йылда гимназиябыҙға "ЮНЕСКО мәктәбе" исеме бирелде. Балалар менән төрлө сараларҙа ҡатнашабыҙ, проекттар өҫтөндә эшләйбеҙ. Был эшмәкәрлек уҡыусыларға донъяны танып белеү даирәһен киңәйтергә булышлыҡ итә, яңы белем эстәү өсөн юлдар аса. Башҡорт гимназияһы булараҡ, беҙ башлыса башҡорт халҡының мәҙәниәте, сәнғәте, ғөрөф-ғәҙәттәре менән таныштырыуҙы маҡсат итеп ҡуябыҙ, - тине Ишембай ҡалаһындағы Ә.-З. Вәлиди исемендәге 2-се Республика башҡорт гимназияһының ЮНЕСКО эшмәкәрлеге буйынса координаторы Гүзәлиә Фәйзуллина. Ултырышта ҡатнашыусылар үҙ-ара ихлас аралашып, тәжрибә уртаҡлашып, башланып торған уҡыу йылына яңы пландар билдәләп таралышты. Автор фотолары.