"Ҡатын-ҡыҙ бәхете биләмәһе" - республиканың иң үҙәгендә

Красноусол ауылының район мәҙәниәт йорто был көндө ҡатын-ҡыҙҙарҙы тартып тороусы урынға әүерелде.Бында “Ҡатын-ҡыҙ бәхете биләмәһе” асыҡ академия проекты саралары үтте. Йәштәре һәм ҡыҙыҡһыныуҙары төрлө булған ҡатын-ҡыҙҙар бергә матурлыҡ һәм стиль серҙәре менән бүлешергә, үҙҙәренең һәм балаларының һаулыҡтарын тикшерергә, белгестәрҙең консультацияларын алырға йыйылды. Проект сиктәрендә “Шәфҡәтлелек баш ҡалаһы” хәйриә фондының “Изге эштәр дәүере” акцияһы сиктәрендә хәйриә ярҙамына сертификат тапшырыу саралары ла үтте. -Ҡәҙерле Ғафури районында йәшәүселәр! Һеҙҙең районға беренсегә килеүем түгел һәм бөгөн дә бында булыуыма шатмын. Һеҙҙең районды бик яратам: ул тәбиғәте менән һәм, әлбиттә, талантлы кешеләре менән матур. Һеҙ бик күп изге эштәр башҡараһығыҙ. Был сараның тап үҙҙәрендә үтеүен һораған мөрәжәғәттәр ҙә ғафуриҙарҙан күп булды. Һәм, ниһайәт, был көн тыуҙы. Бергәләп проектыбыҙҙы эшләгәндә йола ҡиммәттәрен һаҡлайбыҙ. Ә йолалар һәм ҡиммәттәр беҙҙән һәм ғаиләбеҙҙән башлана. Бөгөн бында килеүселәрҙең барыһына ла, фекерҙәштәрен табыусыларға, тәжрибәләре менән уртаҡлашыусыларға рәхмәтемде белдерәм. Табиптар һәм спикерҙар командаһына ла рәхмәт, күптәре беҙҙең менән райондан-районға йөрөйҙәр, - тип тәбрикләне “Бәхет биләмәһе” мәрхәмәтлек фондының попечителлек советы рәйесе Каринэ Хәбирова. “Ҡатын-ҡыҙ бәхете биләмәһе” бер нисә биләмәгә бүленгән. Һәр биләмә мәғлүмәт, файҙа бирә. Йолаға ярашлы, асыҡ академия программаһы лекторийҙар, оҫталыҡ дәрестәре, белгестәр консультациялары менән тулыланған. Был биләмәлә лә майҙансыҡтарҙа ҡатын-ҡыҙ һаулығы, йәшлек, матурлыҡ, ғаиләләге мөнәсәбәттәр темаһына табип һәм психологтарҙың лекциялары ойошторолдо. Республиканың әйҙәүсе белгестәре тарафынан бушлай консультациялар бирелде. Баш ҡала табиптарының командаһы 170 консультация уҙғарҙы. Күсмә стоматология комплексы докторҙары 67 баланы ҡарап, дауалап өлгөрҙө. “Ярҙам биләмәһендә” махсус хәрби операцияла ҡатнашыусыларға һәм ғаиләләренә ярҙам саралары буйынса брифинг ойошторолдо. Финанс, медицина, социаль, юридик ярҙам тураһында һорауҙарға төрлө министрлыҡ һәм ведомство вәкилдәре яуап бирҙе. Махсус хәрби операцияла ҡатнашыусыларҙың әсәләренә һәм ҡатындарына Башҡортостандың атҡаҙанған рәссамы Рушания Бәҙретдинова арт-терапия уҙғарҙы. “Аҡыл һәм әүҙем оҙон ғүмер биләмәһе” иң тоғро аудиторияны йыйҙы, улар өсөн махсус лекциялар әҙерләнде. Красноусол үҙәк район дауаханаһы табиптары өсөн “Һөнәри үҫеш биләмәһе” ойошторолдо. Дәүләт мәшғүллек хеҙмәтенең уҡыу үҙәге психологы Марина Фисенко релакс техникаһы менән уртаҡлашты. “Ҡатын-ҡыҙ бәхете биләмәһе”нең тантаналы өлөшө “Изге эштәр дәүере” хәйриә акцияһы менән дә иҫтәлекле булды. Район мәҙәниәт йорто сәхнәһендә акцияның инициаторы Геннадий Дюмин менән “Шәфҡәтлелек баш ҡалаһы” фонды етәксеһе Анна Деникина мәрхәмәтлек ярҙамына сертификатты Башҡортостандың Ғаилә, хеҙмәт һәм халыҡты социаль яҡлау министры Ленара Ивановаға тапшырҙы. Мәскәүҙән килгән хәйриә йөгөндә уйынсыҡтар, кәнсә тауарҙары, кейемдәр, гигиена кәрәк-яраҡтары һәм башҡа әйберҙәр бар. Улар барыһы ла республиканың балалар учреждениеларына, ғаилә тәрбиәһенә ярҙам үҙәктәренә, социаль приюттарға бүленәсәк, күп балалы һәм аҙ тәьмин ителгән ғаиләләргә тапшырыласаҡ. “Изге эштәр дәүере” проектының маҡсаты – етем, күп балалы һәм аҙ тәьмин ителгән ғаиләләрҙәге балаларға ярҙам итеү. -Ҙур шатлыҡ менән был акцияны уҙғарабыҙ. Унда бик күптәр ҡатнаша. Ошондай изге эштә ҡатнашыу китаптар, уйынсыҡтар, мәктәп тауарҙары алған балаларға ҡарағанда ҙурыраҡ кинәнес бирә. Башҡортостан Башлығы Радий Хәбировҡа ҡыйыулығы өсөн, уның тормош юлдашына әүҙем йәмәғәт эшмәкәрлеге алып барғаны өсөн рәхмәт, - тине Геннадий Васильевич. Аҙна уртаһы Красноусолда йәшәүселәр өсөн матур танышыуҙар, илһамлы идеялар менән иҫтәлекле булды. Иң мөһиме – һәр кем бында ярҙам, изге кәңәш, йылы мөнәсәбәт тойҙо. “Ҡатын-ҡыҙ бәхете биләмәһе” асыҡ академияһы саралары Башҡортостан Башлығы гранттары фонды ярҙамында уҙғарыла. Ойоштороусыларҙың фотолары.