20 сентябрҙә Балтас районына эш сәфәре барышында Башҡортостан Башлығы Радий Хәбиров Тоҙлоуба ауылындағы социаль инфраструктура объекттары менән танышты. Балтас районы хакимиәте башлығы Илгиз Субушев аңлатыуынса, ауыл социаль программа буйынса газлаштырыла. Ул йорттарға тиклем бушлай зәңгәр яғыулыҡ үткәреүҙе күҙ уңында тота. Хәтерегеҙгә төшөрәбеҙ, 2022 йыл аҙағында Рәсәй Президенты Владимир Путин социаль газлаштырыу программаһын ғәмәлгә ашырыу ваҡытын оҙайтты. Бынан тыш, уға социаль объекттар – медицина һәм мәғариф ойошмалары индерелде. Тоҙлоубала 234 кеше йәшәй. Газ үткәреүгә 46 ғариза ҡабул ителгән, уларҙың 24 йорто газлы булған да инде. Тағы ла 10 йортта селтәрҙәр үткәреү буйынса эштәр башҡарыла. Шуны билдәләргә кәрәк: күп балалы ғаиләләр, махсус хәрби операцияла ҡатнашыусыларҙың ғаиләләре һәм халыҡтың башҡа льготалы категориялары газ үткәреүгә 100 мең һумлыҡ сертификат алыу хоҡуғына эйә. Республика Башлығы менән аралашыу барышында халыҡ Тоҙлоуба ауылының "Урындағы башланғыстарға булышлыҡ итеү" программаһында әүҙем ҡатнашыуы хаҡында һөйләне. Мәҫәлән, 2019 йылда ауылда яңы клуб төҙөлгән. Быйыл иһә балалар майҙансығы сафҡа индерелгән. Тоҙлоуба ауылы халҡы менән аралашыу йомғаҡтары буйынса төбәк етәксеһе Башҡортостандың Транспорт министрлығына һәм Балтас районы хакимиәтенә ауылдың үҙәк урамын тәртипкә килтерергә һәм уға ҡырсынташ түшәргә ҡушты. Фото: glavarb.ru