Әлфинур апай Смаҡова Ауырғазы районының Мораҙым ауылында йәшәй. Ул – урындағы “Хазина” фольклор төркөмөнөң әүҙем ағзаһы, ауылда үткән барлыҡ сараларҙың уртаһында ҡайнап йөрөй. Әлфинур Әхиәр ҡыҙы тегеү-бәйләү, ҡорама ҡорау кеүек эштәргә маһир. Шулай уҡ халҡыбыҙҙың милли йолаларын, ғөрөф-ғәҙәттәрен тергеҙеүгә ҙур өлөш индерә, ошо йүнәлештәге оҫталыҡ дәрестәрендә ҡатнашып, белгәндәре менән ихлас уртаҡлаша. Милли кейем тегеү йәһәтенән дә тәжрибәһен бүлешә. Әлфинур Әхиәр ҡыҙының тағы ла бер матур шөғөлө – ҡурсаҡтарға милли кейем тегеү. Уның сынъяһау кейемдәрен кейгән иҫке ҡурсаҡтар шунда уҡ яңырып, танымаҫлыҡ булып үҙгәрә. Тағы ла төбәк халҡы Әлфинур Смаҡованы балаҫ һуғыу оҫтаһы булараҡ белә һәм хөрмәт итә. Фотолар: Әлфинур Смаҡованың социаль селтәрҙәге сәхифәһенән.