Проекттар туризм инфраструктураһын үҫтереү өсөн субсидияларға ике конкурстың өҫтәмә этабы йомғаҡтары буйынса һайланды. “Сентябрҙә конкурстың өҫтәмә этабына йомғаҡ яһаныҡ. Унда бөтәһе 76 ғариза бирелде, 44 проект еңеүсе тип танылды. Улар ярҙамында Башҡортостанда бөтә категория туристары өсөн уңайлыраҡ шарттар булдырыласаҡ”, – тип билдәләне республиканың эшҡыуарлыҡ һәм туризм министры Рөстәм Афзалов. Июнь айында үткәрелгән беренсе конкурс йылға, күл, һыуһаҡлағыстар буйында пляждар төҙөүгә һәм үҫтереүгә, шулай уҡ балалар һәм спорт ял итеү зоналарын төҙөкләндереүгә, йәмәғәт туҡланыу пункттарын булдырыуға субсидиялар биреүҙе күҙ уңында тота. Өҫтәмә этапта 20 проект ҡатнашҡан, уларҙың 16-һы еңеүсе тип танылған. Гранттарҙың дөйөм суммаһы 116,7 миллион һум тәшкил итәсәк. Конкурс шарттары буйынса грант алыусылар үҙ аҡсаларын һалырға тейеш. Был конкурс буйынса инвестициялар суммаһы 144,2 миллион һум тәшкил итәсәк. Икенсе конкурста 56 эшҡыуар һәм ойошма ҡатнашты. Уларҙың 28-е дөйөм суммала 70,1 миллион һумлыҡ грант отто. Аҡса турист ҡорамалдары һатып алыуға, яңы маршруттар әҙерләүгә, тур маршруттары буйынса электрон белешмәләр һәм һаулығы буйынса мөмкинлектәре сикләнгән кешеләр өсөн уңайлы мөхит булдырыуға йүнәлтеләсәк. Билдәле булыуынса, "Туризм һәм ҡунаҡсыллыҡ индустрияһы” (национальный проект “Туризм и индустрия гостеприимства”) милли проекты Рәсәй Президенты Владимир Путиндың май указы менән булдырылды. Фото: национальныепроекты.рф