Рәсәйҙең уйынсыҡтар етештереү сәнәғәте нисек үҫешә?

«Уйын ғына түгел: Рәсәй уйын индустрияһының роле, әһәмиәте һәм үҫеш нөктәләре» тип аталған пленар ултырыш үтте. Сарала Башҡортостан Хөкүмәте, Рәсәй Федерацияһы Федераль Йыйылышының Федерация Советы, Рәсәй Сәнәғәт һәм сауҙа министрлығы һәм Рәсәй Мәғариф министрлығы вәкилдәре, Балалар тауарҙары сәнәғәте предприятиелары ассоциацияһы, Рәсәй Мәғариф академияһы, төбәк власть органдары етәкселәре, шулай уҡ алдынғы уйындар һәм уйынсыҡ етештереүселәр ҡатнашты. Фекер алышыуға Иран делегацияһы вәкилдәре лә ҡушылды. Бөгөнгә Рәсәйҙә балалар тауарҙары сәнәғәтен балалар өсөн тауар етештереүсе 15-тән ашыу тармаҡ тәшкил итә. Шуларҙың бишәүһе балалы ғаиләләрҙе хеҙмәтләндереү тармағына ҡағыла. Шул уҡ ваҡытта балалар тауарҙарының баҙар әйләнеше күләме 1,08 триллион һум тәшкил итә. Фараздар буйынса, быйыл был һан кәм тигәндә 10-12 процентҡа үҫәсәк, Рәсәйҙең уйын һәм уйынсыҡтар етештереүселәренең тауары иһә 30 процентҡа артыр тип күҙаллана. Ҡатнашыусыларҙың барыһы ла бер тауыштан балалар өсөн етештерелгән тауарҙың сифатының мөһимлеген билдәләне. «Балаларыбыҙҙың иң яҡшы, иң хәүефһеҙ, иң уңайлы уйындар һәм уйынсыҡтар менән уйнауын тәьмин итергә тейешбеҙ. Улар баланың үҫешенә ыңғай йоғонто яһарға тейеш. Быны тәьмин итер өсөн Башҡортостан Хөкүмәте бер нисә йүнәлеш буйынса эшләй. Әлеге тармаҡ үҫешә генә һәм йылына тармаҡ 15 миллиард һум күләмендә аҡса килтерә», — тине Башҡортостан Хөкүмәте Премьер-министры Андрей Назаров. Башҡортостан Хөкүмәте балалар тауарҙарының йәлеп итеүсәнлеген һәм хәүефһеҙлеген тәьмин итеү өсөн бер нисә яңы сара тәҡдим итә. Тәүгеһе ул һынау лабораторияһын булдырыу. Артабан мәктәпкәсә йәштәге учреждениелар менән эштең яңы федераль стандартын ҡабул итеү. Икенсеһе – уйындар һәм уйынсыҡтар етештереүҙе иҡтисади платформаға индереү. Өсөнсөһө иһә – иң яҡшы тәжрибәләрҙе һәм технологияларҙы өйрәнеү өсөн дуҫ илдәр менән хеҙмәттәшлекте үҫтереү. «Бындай фестивалдең үткәрелеүе – балалар тауарҙары сәнәғәтенә булышлыҡ итеү буйынса ҙур эш алып барылыуын күрһәтә. Был сара дәүләт власы органдары вәкилдәрен, эксперттар, ата-әсәләр берләшмәһен, Рәсәйҙең алдынғы балалар продукцияһын етештереүселәрҙе йыя. Фестивалдә балалар өсөн эске баҙарҙа заманса, сифатлы, хәүефһеҙ һәм арзан продукцияның өлөшөн арттырыуға йүнәлтелгән иң яҡшы төбәк тәжрибәһе күрһәтеләсәк. Рәсәй предприятиеларының Рәсәй тарихы геройҙарын, фольклор персонаждарын һүрәтләгән уйындарҙы һәм уйынсыҡтарҙы күберәк сығарырға теләүен һыҙыҡ өҫтөнә алыу мөһим. Бындай ҡараш традицион ҡиммәттәргә һәм мәҙәниәткә нигеҙләнгән рухи һәм әхлаҡи тәрбиәләү бурыстарына яуап бирә. Сара тәжрибәне дөйөмләштереүгә һәм балалар тауарҙары сәнәғәте кеүек мөһим тармаҡтың системалы үҫешенә булышлыҡ итер тип ышанам», - тине сәләмләү һүҙендә Рәсәй Федерацияһы Федераль Йыйылышының Федерация Советы Рәйесе Валентина Матвиенко. Президенттың йәмәғәт проекттары идаралығы етәксеһе Сергей Новиков шулай уҡ Бөтә Рәсәй «Әйҙә уйнарға» фестивалендә ҡатнашыусыларҙы һәм ҡунаҡтарҙы сәләмләп, балалар тауарҙары сәнәғәтенә ярҙам итеүҙең айырым мөһимлеген һыҙыҡ өҫтөнә алды: “Балалар тауарҙарының ватан сәнәғәтенә булышлыҡ итеү һәм үҫтереү – Рәсәйҙең рухи-әхлаҡи ҡиммәттәрен һаҡлау һәм нығытыу буйынса дәүләт сәйәсәтен тормошҡа ашырыуҙа мөһим бурыс булып тора. Бөтә Рәсәй буйынса етештереүселәр, дизайнерҙарҙы, уҡытыусыларҙы, иң мөһиме, балаларҙың үҙҙәрен һәм уларҙың ата-әсәләрен берләштереп, ҡулланыусыларҙың хәҙерге ихтыяждарынан сығып, иҡтисадтың был тармағын үҫтереүгә яңыса ҡараштар булдырыуға йүнәлтелгән”, - тине Сергей Новиков. Ултырыш сиктәрендә инвестиция эшмәкәрлеген дәртләндереү буйынса дәүләт ярҙамының яңы саралары, шулай уҡ уйындарҙы һанлаштырыу темаһы тикшерелде. Федерация Советының фән, мәғариф һәм мәҙәниәт буйынса комитеты рәйесе Лилиә Ғүмәрова белдереүенсә, Рәсәй Федерацияһы Хөкүмәте Дәүләт Думаһына һалымға дусар булған балалар өсөн тауарҙар исемлеген 10 процентҡа кәметелгән ставка менән киңәйтеүҙе күҙ уңында тотҡан закон проектын индерҙе. Ата-әсә тәрбиәһендә мәғрифәтселек, ялған продукция менән көрәш мәсьәләләренә лә иғтибарҙы арттырыу мөһим. Сенатор балалар һәм йәштәр өсөн Рәсәй фильмдарын тулы дәүләт финанслауына алыу, етештереүе һәм таратылыуы тураһында былтыр ҡабул ителгән законды тиҙ ғәмәли тормошҡа ашырыуҙы талап итте. Лилиә Ғүмәрова фекеренсә, анимацион балалар фильмдары өсөн ҡануниәттә ошондай уҡ үҙгәрештәрҙе күҙ уңында тоторға кәрәк. "1812 йылғы Ватан һуғышы геройҙары тураһында "Төньяҡ амурҙары" кеүек сағыу, һоҡланғыс, изге йәнһүрәттәр сығарыуҙы ғәмәлгә ашырыға кәрәк. Нәҡ ошондай миҫалдарҙа беҙҙең балаларҙы сит ил геройҙары өлгөһөндә түгел, ә үҙебеҙҙең миҫалда тәрбиәләргә кәрәк», — тине сенатор. Сара барышында төбәктәр балалар тауарҙары сәнәғәтен үҫтереүҙең иң яҡшы тәжрибәләрен тәҡдим итте һәм уларҙы федераль кимәлгә сығарырға кәрәклеге билдәләнде. Рәсәй Федерацияһының мәғариф министры урынбаҫары Татьяна Васильева заманса хәүефһеҙ белем биреү мөхитен көйләү мәсьәләләренә иғтибар итте. Рәсәй Мәғариф министрлығы Президентының күрһәтмәләрен үтәү сиктәрендә эксперттар менән берлектә иң яҡшы тәжрибәләрҙе ҡулланып, мәктәпкәсә белем биреү программаларын, шул иҫәптән Рәсәй Федерацияһы субъекттарынан, инфраструктура булдырыу буйынса тәҡдимдәр һәм уҡытыу материалдарының тулы йыйылмаһын әҙерләй. Тәҡдимдәр һатып алынған ҡорамалдарҙы ҡулланыу, хәүефһеҙлек, был ҡорамалдарҙы уҡыу процесында ҡулланыу буйынса талаптарҙы берләштерә, бынан тыш, уҡыу ҡорамалдарын уҡыу-методик материал менән бәйләйҙәр. Балалар тауарҙары сәнәғәте предприятиелары ассоциацияһы президенты Антонина Цицулина фекеренсә, «Әйҙә уйнарға» фестивале Башҡортостанда балалар тауарҙары сәнәғәтен үҫтереү, республика етештереүселәре продукцияһына ихтыяжды дәртләндереү өсөн «юл картаһы»ның үҙенсәлеге булырға тейеш. «Ата-әсәләребеҙ һәм уҡытыусыларыбыҙ аңлы рәүештә Рәсәй етештереүсеһен һайлай алһын, милли брендтар барлыҡҡа килһен өсөн улар менән танышырға кәрәк. Шуға күрә Президенттың бындай ҡулланыусылар форумдарын һәм фестивалдәрен үткәреү тураһындағы бойороғон хупларға кәрәк. «Бала саҡ өсөн уйындар һәм тауарҙар» федераль проекты булырға тейеш тип иҫәпләйбеҙ, ул, шул иҫәптән, уйындар һәм уйынсыҡтар эшләүселәргә субсидия биреүҙе лә үҙ эсенә аласаҡ. Фестивалдең бизнес-программаһы сиктәрендә тәҡдим ителгән барлыҡ башланғыстар Рәсәй Федерацияһы Хөкүмәтенә ебәреләсәк», — тип йомғаҡ яһаны Цицулина. Фото "Әйҙә уйнайыҡ" фестиваленең матбуғат хеҙмәтенән.