Был көн Ауырғазы районы халҡы өсөн тарихҡа инеп ҡалыр, тип яҙалар район хакимиәтенән. 79 йыл үткәндән һуң, Төрөмбәт ауылы егете, Бөйөк Ватан һуғышында һәләк булған Ғиндәлиф Заһитовтың батырлыҡ өсөн наградаһына – Ҡыҙыл Йондоҙ орденына танытма уның берҙән-бер ҡыҙы, педагогия хеҙмәте ветераны Миңлегөл Ғиндәлиф ҡыҙына тапшырылған. Был иҫтәлекле сараны район хакимиәте башлығы Арыҫлан Шәһәретдинов атҡарған. Быға ҡәҙәр яугирҙең яҡындары уның хәрби хеҙмәтенә ҡағылышлы бер ниндәй ҙә мәғлүмәтте белмәгән. Хәрби хеҙмәткә саҡырылыуы, вафаты тураһында белешмәләр, башҡа документтар ҙа ғаиләлә һаҡланмаған. Һәм бына 2018 йылда яугирҙең ейәнсәре – Нурия Урал ҡыҙы ҡиммәтле мәғлүмәттәр табыуға өлгәшә. Эҙләнеү барышында ул Рәсәй Оборона министрлығы Үҙәк архивының интернеттағы асыҡ электрон архив документтарында ҡаһарман олатаһының хәрби хеҙмәте барышына, үлеменә, ерләнгән урынына ҡағылған яҙыуҙарға һәм күрһәткән батырлығы өсөн Ҡыҙыл Йондоҙ орденына тәҡдим ителеүе тураһындағы награда ҡағыҙына юлыға. Рәсәй Оборона министрлығы Үҙәк архивынан килгән архив белешмәһендә награданы тапшырыу тураһында яҙыу булмай. Ниһайәт, батыр яугирҙең ҡыҙы, яҡындары уның яҙмышын асыҡлауға ирешә, батырлығы хаҡында белә, был - улар өсөн генә түгел, ә Ғиндәлиф Заһитовтың яҡташтары өсөн дә иҫтәлекле, мөһим ваҡиға. Ғиндәлиф Хаммат улы Заһитов 1905 йылда Төрөмбәттә тыуған. Һуғышҡа ҡәҙәр колхоздың ветеринария фельдшеры булып эшләй. 1942 йылдың ғинуарында һуғышҡа китә. Ошо йылдың май айынан алып 40-сы гвардия танк бригадаһы составында гвардия кесе сержанты званиеһында яуҙа ҡатнаша. 1944 йылдың 18 июлендә Добраник ауылы өсөн барған алышта кесе сержант Заһитов ҙур батырлыҡ күрһәтә. Бүлексә составында ул беренсе булып ауылға барып инә, ҡул һуғышында, автоматсылар уты менән фашистарға ҡаршы тора. Батальон килеп еткәнсегә ҡәҙәр ике сәғәттән ашыу һөжүмде кире ҡағып тороуға өлгөшә, дошмандың ике взводын тиерлек юҡ итә. Башҡорт батырының ҡаһарманлығы совет яугирҙәренә ауылды алырға ярҙам итә. 1944 йылдың 21 авгусында Ғиндәлиф Заһитов батырҙарса һәләк була. Ул Польшаның Келецк өлкәһе Кихары ауылы янындағы туғандар ҡәберлегендә ерләнгән. Бөйөк Ватан һуғышы тарих төпкөлөнә инә барған, Ватаныбыҙ тарихындағы ҡанлы, иң ауыр йылдар тураһында һөйләрҙәй кешеләр аҙайған һайын, бындай мәғлүмәттәрҙең ҡиммәте арта бара. Киләһе быуындар Ғиндәлиф Заһитов кеүек ҡаһармандарыбыҙ тураһында белергә тейеш. Сығанаҡ: vk.com/aurgazy.bashkortostan