Кисә Әбйәлил районының Сиҙәм урта мәктәбендә шағир, драматург, Шәйехзада Бабич исемендәге йәштәр дәүләт премияһы лауреаты Рәмил Ҡол-Дәүләттең (Дәүләтҡоловтың) тыуыуына 65 йыл тулыуға арналған "Ерҙән тыуып ергә китәсәкбеҙ... " тип аталған хәтер кисәһе үтте. Кисәне БР Милли әҙәбиәт музейы һәм БР Яҙыусылар союзы менән берлектә ойошторҙо. Сараны шағирә, Рәмил Ҡол - Дәүләт исемендәге премия лауреаты Зөлфирә Ҡарағужина бик матур, йәнле итеп алып барҙы. Шағирҙың төрлө йылдарҙа баҫылып сыҡҡан китаптарынан, фотоларынан торған бай күргәҙмә эшләнелгән. Бай йөкмәткеле күргәҙмә менән музей хеҙмәткәре Регина Камалова таныштырҙы. Сараға Рәмил Ҡол - Дәүләттең бер туған апайы Әнисә Хафизова, Вил ағаһы килгән. "Яҡташ шағирыбыҙҙың һабаҡташтары уның хаҡындағы хәтирәләре менән бүлеште. Хисмәтулла Юлдашев Рәмил Ҡол - Дәүләткә арналған шиғырын тамашасыларға уҡып ишеттерҙе. Әхмәр Үтәбай Рәмил дуҫының ябайлығы, эскерһеҙлеге, һәр ваҡыт ярҙам ҡулы һуҙырға әҙер торған шәхес булыуы хаҡында һөйләне. Ул шағир дуҫы тураһында тамашасыларға ҡыҙыҡлы һорауҙар биреп, дөрөҫ яуап ҡайтарғандарға "Ағиҙел " журналын бүләк итте. Шағирҙың тағы бер һабаҡташы, Рәмил Ҡол - Дәүләттең күп кенә шиғырҙарына көй яҙыусы, уҡытыусы - композитор Вәғиз Сабитов моңло йырын башҡарҙы. Кисәлә шулай уҡ БР халыҡ яҙыусыһы, Салауат Юлаев исемендәге дәүләт премияһы лауреаты Таңсулпан Ғарипова, шағирә, Шәйехзада Бабич исемендәге йәштәр дәүләт премияһы лауреаты Тәнзилә Дәүләтбирҙина, шағирә, журналист Гөлнара Хәлфетдинова, Әбйәлил яҙыусыларының "Йәйғор" әҙәби ойошмаһы ағзалары Иҙрис Ноғоманов, Фәнүзә Биктимерова ҡатнашты. Улар мәктәп уҡыусыларына уҡыуҙарында уңыштар теләне, Рәмил Ҡол - Дәүләт тураһындағы иҫтәлектәре менән уртаҡлашты,мәктәп китапханаһына үҙҙәренең китаптарын бүләк итте. Хәтер кисәһе онотолмаҫ тәьҫораттар ҡалдырҙы ", -тип яҙған үҙенең битләүендә Сиҙәм урта мәктәбенең башҡорт теле һәм әҙәбиәте уҡытыусыһы Алһыу Сәғитова. Әйткәндәй, шағирҙың тыуған ауылы Әлмөхәмәттә эшләп килгән Рамазан Өмөтбаев исемендәге музейҙа Рәмил Дәүләтҡоловтың ижадына һәм тормош юлына арналған бик бай экспонаттар тупланған. Фото һәм текст сығанағы: Алһыу Сәғитованың "Бәйләнештә"ге сәхифәһенән