Бөгөн Башҡортостандың халыҡ артисы Рөстәм Ғиззәтуллин тыуған көнөн билдәләй. Рөстәм Әлшәй районының Шафран ауылында тыуған, Яңы Сәпәш мәктәбендә һәм Раевкалағы М. Буранғолов исемендәге башҡорт лицейында белем ала. Артабан Өфө сәнғәт училищеһында Олег Хановтың төркөмөндә уҡып, актер һөнәренә эйә була. Махсус рәүештә Милли йәштәр театры өсөн әҙерләнгән төркөмдә уҡыһа ла, Рөстәм эстрадала билдәлелек яулай. Уның “Яҙ килә”, “Һиңә генә”, “Ашыҡма” һәм башҡа йырҙарын тыңлап үҫкән быуын – бөгөн дүрт-биш тиҫтә ғүмер кисергән кешеләр. Хәҙер инде уларҙың балалары ошо йырҙарҙы тыңлай. “Яңыраҡ концертымда “Яҙ килә” йырын башҡарғайным, 16-17 йәшлектәр ҡушылып йырлай, ә бит был йырыма шул сама “йәш”, - ти Рөстәм Ғиззәтуллин. – Баштараҡ мине йырламайһың, хәбәр һөйләгән кеүекһең, тип шелтәләгән кешеләр ҙә бар ине. Әммә күреүегеҙсә, шул йырҙар һаман йәшәүен дауам итә”. Әлеге ваҡытта Рөстәм Хәниф улы элекке ише ҙур концерттар бирмәй, башлыса продюсерлыҡ, йырҙар ижад итеү һәм аранжировкалар эшләү менән шөғөлләнә. Продюсер булараҡ, йәш таланттарҙы үҫтереүҙе, заманса, Рәсәй, сит ил кимәлендә тәҡдим итерлек проекттар эшләүҙе маҡсат итеп ҡуя. Әммә ул күптәрҙең яратҡан йырсыһы булып ҡала. Тыуған көнө айҡанлы ихлас тәбрикләп, беҙ уға ныҡлы һаулыҡ, ғаилә именлеге, барлыҡ уй-ниәттәренең тормошҡа ашыуын, маҡсаттарына өлгәшеп йәшәүен теләйбеҙ! Фото: Р. Ғиззәтуллиндың социаль селтәрҙәге сәхифәһенән.