Башҡортостанда тағы 67 “Үҫеш нөктәһе” үҙәге асылды

Башҡортостандың ауыл ерендә һәм бәләкәй ҡалаларында урынлашҡан «Үҫеш нөктәһе» төбәк белем биреү үҙәктәре селтәре 2023 йылдың 1 сентябренән тағы 67 үҙәккә артҡан. Бөгөн беҙҙә уларҙың дөйөм һаны 665 тәшкил итә. 29 августа Өфө районының Шамонин ауылы мәктәбендә «Үҫеш нөктәһе» тәбиғи-ғилми һәм технологик йүнәлештәге мәғариф үҙәктәре педагогтары өсөн республика методик семинары үтте. Семинарҙың пленар өлөшөндә Башҡортостан Республикаһы Мәғариф һәм фән министрлығының дөйөм белем биреү өлкәһендә дәүләт сәйәсәте бүлеге начальнигы Жанна Миникеева, Педагогик хеҙмәткәрҙәрҙең һөнәри оҫталығын арттырыу үҙәге етәксеһе Эльза Бәширова ҡатнашты. Семинар программаһы «Химия», «Физика», «Биология» предметтары, робот техникаһы нигеҙҙәре һәм пленар өлөш буйынса оҫталыҡ дәрестәренән торҙо. Шамонин, Николаевка ауылдары мәктәптәре һәм С.С. Ильин исемендәге Жуков ауылы мәктәбе уҡытыусылары һанлы лабораторияларҙы дәрестә һәм дәрестән тыш эшмәкәрлектә практик ҡулланыу тәжрибәһе менән уртаҡлашты. Семинарҙа бөтә республиканан 180-дән ашыу педагог ҡатнашты, улар робот техникаһының һанлы лабораториялары һәм комплекттары мөмкинлектәрен ҙур ҡыҙыҡһыныу менән өйрәнде, шулай уҡ уҡытыусылар үҙ-ара тәжрибә уртаҡлашты. 2019-2021 йылдарҙа Башҡортостан Республикаһында 382 мәктәптә «Заманса мәктәп» федераль проектын тормошҡа ашырыу барышында «Үҫеш нөктәһе» һанлы тәбиғи-ғилми һәм гуманитар профилле үҙәктәр булдырылған, «Информатика», «Технология», «Тормош хәүефһеҙлеге нигеҙҙәре», «Химия», «Биология», «Физика» предметтары буйынса уҡыу программаларын тормошҡа ашырыу өсөн матди-техник база яңыртылған. Был йүнәлештә алып барылған маҡсатлы эштәр ил Президенты Владимир Путиндың май указдары тарафынан раҫланған “Мәғариф” милли проекты (национальный проект “Образование”) ҡуйған бурыстарҙы тормошҡа ашырырға туранан-тура булышлыҡ итә. Сығанаҡ һәм фото: education.bashkortostan.ru