Роксана Ғайсина “ГеоВызов” халыҡ-ара чемпионатында ҡатнаша

Октябрьский ҡалаһынан Роксана Ғайсина ошо ҡалалағы нефть колледжында уҡый һәм, был уҡыу йортоноң дүрт студенты кеүек үк, “ГеоВызов” чемпионаты ярыштарына әҙерләнә. Буласаҡ геолог өсөн был киң масштаблы сарала ҡатнашыу – киләсәктә һөнәре буйынса эш биреүселәр менән танышыу, командалар файҙалы ҡаҙылмалар табасаҡ майҙансыҡтарҙа булыу, тиҫтерҙәре менән аралашыу. “Һигеҙенсе кластан алып геологияға маҡсатлы йүнәлеш менән барам. Беҙҙең төбәк төрлө ҡаҙылмаларға ғына түгел, ә уникаль геологик объекттарға ла бай. Мине һәр саҡ уларҙың тарихы ҡыҙыҡһындыра, – ти Роксана. – “ГеоВызов”та заданиелар ҡатмарлы буласаҡ тип көтәбеҙ, ләкин беҙҙең белем кимәле лә ҡалышырлыҡ түгел, беҙҙең колледжда һәйбәт уҡытылар, уны тамамлаусылар илебеҙҙең ҙур компанияларында уңышлы эшләй”. Фото: асыҡ сығанаҡтарҙан.