Ошондай ҡыйыу егеттәр тәрбиәләгән ата-әсәләргә рәхмәт!

15 сентябрҙә Көйөргәҙе районының Кинйәабыҙ ауылында Башҡортостан Башлығы Радий Хәбиров махсус хәрби операцияла ҡатнашыусыларҙың ғаиләләре һәм ҡыҫҡа ваҡытлы ялға тыуған яғына ҡайтҡан яугир менән осрашты. Ул ата-әсәләрҙән улдарының ҡайһы ерҙәрҙә һуғышҡанын, бәйләнешкә сығамы-юҡмы икәнлеге менән ҡыҙыҡһынды. Ә иһә ата-әсәләр уға яҡындарының махсус хәрби операция биләмәһендә тәүге көндәрҙән үк булыуын һәм ялға ҡайтып китеүҙәрен һөйләне. – Мин Башҡортостан яугирҙәре һуғышҡан частарға күп тапҡыр барҙым. Улар ҡуйылған бурыстарҙы лайыҡлы үтәй, намыҫлы көрәшә. Ә беҙ уларға ярҙам итергә, кәрәкле әйберҙәр менән тәьмин итергә тырышабыҙ. Беҙҙең хәстәрлекте часть командирҙары ла күрә. Бөгөн тағы Өфөнән яугирҙәргә сираттағы ҙур гуманитар ылау ебәрәбеҙ, – тип хәбәр итте Радий Хәбиров. – Ошондай ҡыйыу егеттәр тәрбиәләгән ата-әсәләргә рәхмәт! Улдарығыҙға ҙур сәләм әйтегеҙ. Беҙ уларҙы имен һәм һау-сәләмәт ҡайтыуҙарын түҙемһеҙләнеп көтәбеҙ. Мобилизация менән хәрби операция биләмәһенә юлланған яугир үҙенең отделениеһы Запорожьела булыуын һөйләне һәм республика Башлығына, Башҡортостан халҡына күрһәткән ярҙамдары өсөн рәхмәт әйтте. Осрашыу һуңында иһә Кинйәабыҙ ауылында йәшәүсе яугир ата-әсәләре Күмертау ҡалаһы менән тоташтырып тороусы юлдарын йүнәтеүҙә ярҙам һораны. Көйөргәҙе районы хакимиәте башлығы Юлай Ильясов был 35 саҡрым оҙонлоҡтағы юл биш тораҡ пункт аша үтә, тип аңлатып үтте. Радий Хәбиров, үҙ сиратында, был трассаны ремонтлау буйынса тәҡдимдәр индерергә ҡушты. Фото: Башҡортостан Республикаһы Башлығының матбуғат хеҙмәтенән.