Өфөлә вуз-ара кампустың икенсе сиратын төҙөүгә әҙерлек башланды

Өфөлә Туҡай урамындағы элекке заводты һүтә башланылар. Был эш – Евразия фәнни-белем биреү үҙәгенең вуз-ара студенттар кампусын төҙөү этабының бер өлөшө. Кампус быға тиклем төҙөлгән объекттарҙы реконструкциялауҙы (IQ-парк) һәм яңыларын төҙөүҙе күҙ уңында тота. Туҡай урамындағы заводты һүтеү эштәре студенттарҙы уҡытыуҙа бер нисек тә сағылыш тапмаясаҡ, тип аңлатма бирҙеләр Өфө фән һәм технологиялар университетының матбуғат хеҙмәтендә. - Һаҡлыҡ сараларын үтәү һәм хәүефһеҙлекте тәьмин итеүгә бәйле гуманитар корпус студенттарын дистанциялы алымда уҡыуға күсереү тураһында ҡарар ҡабул иттек. Был форматҡа Иҡтисад, идара итеү һәм бизнес институты, Тәбиғәт һәм кеше институты, Тарих һәм дәүләт идара итеүе институты, Юғары психология һәм педагогика мәктәбе, Юғары философия һәм социология мәктәбе күсәсәк, - тип һөйләне Өфө фән һәм технологиялар университеты ректоры Вадим Захаров. Майҙансыҡ хәүефһеҙлек ҡағиҙәләренә ярашлы кәртәләнгән. Һүтеү эштәрен 30 октябргә тиклем тамамлау күҙаллана. Иҫегеҙгә төшөрәбеҙ, Өфөлә донъя кимәлендәге Евразия фәнни-белем биреү үҙәге төҙөү буйынса эш алып барыла. Проекттың беренсе этабын 2023 йылда, ә икенсе сиратын 2025 йылдың аҙағына тамамлау күҙаллана. Объекттарҙың дөйөм майҙаны 146 мең квадрат метрҙан ашыу тәшкил иткән проект бизнесты, фәнде һәм алдынғы белем биреүҙе йәлеп итеү һәм интеграциялау майҙансығы буласаҡ. Кампус сәйәсәте – етди проект, уны тормошҡа ашырыу «Фән һәм университеттар» милли проекты сиктәрендә дәүләт-шәхси партнерлыҡ механизмдарын һәм концессия килешеүҙәрен ҡулланып, инновацион белем биреү мөхитен булдырыу буйынса федераль программа ярҙамында мөмкин булды. Ул университеттың ролен генә түгел, дөйөм белем биреүҙе лә ҡайтанан ҡарарға тейеш, ә үҙенең барлыҡҡа килеү стадияһында ул хөкүмәтте һәм төбәк структураларын, студенттарҙы, ғилми берләшмәне берләштерергә һәләтле, тип иҫәпләйҙәр вуз-ара студенттар кампусына ингән юғары уҡыу йортонда. Сығанаҡ һәм фото: pravitelstvorb.ru