11-17 сентябрҙә Рәсәй Һаулыҡ һаҡлау министрлығы Алкоголде ҡулланыуҙы һәм уға бәйле үлем осраҡтарын, сирҙәрҙе кәметеү аҙналығын уҙғара. Мәғлүм булыуынса, алкоголдең “хәүефһеҙ”, ул ғына түгел “файҙалы” миҡдары булмай. Айыҡ аҡыл менән, матур итеп йәшәйек, дуҫтар! Беренсенән, айыҡ кеше үҙ уйҙары һәм ҡылығы өсөн үҙе яуап бирә. Уның организмының биохимияһы бәйлелек һәм ағыуланыу тыуҙырыусы төрлө химик матдәләргә бәйле түгел. Айыҡ кеше иртән «Кисә нимә булды һуң әле?», «Мин нисек өйгә ҡайттым?» тигән һорауҙарға яуап бирергә маташмай, башы ауыртмай. Шулай итеп, беренсе өҫтөнлөгө - аныҡ аҡыл һәм ышаныслы хәтер. Икенсенән, айыҡ кеше - ул сәләмәт кеше. Уның физик хәл-торошо аҙнаһына бер тапҡыр эскән кешегә ҡарағанда сирек тапҡырға, ә алкоголизмдан һәм оҙайлы эскенән яфаланған кешегә ҡарағанда 50 процентҡа яҡшыраҡ. Айыҡлыҡ яҡлы кеше 10-15 йылға күберәк йәшәй, сөнки уның йөрәк-ҡан тамырҙары системаһы даими рәүештә ағыулы матдәләр һөжүменә дусар ителмәй. Өсөнсөнән, айыҡ кеше - ул яуаплы һәм сәләмәт әхлаҡлы кеше. Алкоголь тәьҫиренә дусар булған кеше үҙ-үҙен генә үлтермәй. Алкоголь ҡулланыу менән бәйле проблемалар араһында Бөтә донъя һаулыҡ һаҡлау ойошмаһы уларҙың айырым кешеләргә һәм тотош йәмғиәткә айырыуса ҙур социаль һәм иҡтисади зыян килтергәнен билдәләй. Дүртенсенән, айыҡ кеше - ул бәйлелектәре булмаған кеше. Алкоголгә бәйлелек – алкоголгә физик ылығыу ғына түгел, ә эскенең ҡайһы бер тәьҫирҙәренә психологик ихтыяж да. Әгәр кеше, клубта бейегәндә иҫерткес эсемлектәрһеҙ үҙен уңайлы тоймай икән, тимәк, унда бәйлелек бар тигән һүҙ. Әгәр яҡшы компанияла иҫерткес эсемлектәрһеҙ кинәнес алмаһа, киноға һыра шешәһе тотмайынса бармаһа, ауыр эш көнөнән һуң фәҡәт спиртлы эсемлектәр ярҙамында ғына ял итһә – был кешелә алкоголгә бәйлелек бар, тигән һүҙ. Тормошҡа айыҡ ҡараш – ул алкоголь һәм башҡа наркотиктар менән бәйле булмаған аңдың сафлығы һәм асыҡлығы. Айыҡ кешегә һәр саҡ үҙенең физик, интеллектуаль һәм әхлаҡи үҫешендә яңы ҡаҙаныштарға ынтылыу хас. Шуға ла, күрәләтә тороп, тормошоғоҙҙо ағыуламағыҙ, дуҫтар: сәләмәт тәндә – сәләмәт рух! Фото: црб-североморск.рф