Әйҙәгеҙ уйнарға! Балаларыбыҙ ҙа беҙҙең рухта үҫһен

Баш ҡалабыҙҙа “Әйҙә уйнарға” Бөтә Рәсәй фестивале башланды. Илебеҙ тарихындағы был беренсе фестиваль Башҡортостан Республикаһы Башлығы Радий Хәбировтың ҡарары менән уҙғарыла һәм дүрт көн дауамында барасаҡ. Был көндәрҙә Совет майҙанында Рәсәй етештереүселәренең уйынсыҡтар күргәҙмәһе, балаларҙың иң яҡшы уйын өлгөләрен күрһәтеү ойоштороласаҡ. Фестивалдең ҡунаҡтарын һәм ҡатнашыусыларын бай программа: тематик конкурстар һәм оҫталыҡ дәрестәре, спорт турнирҙары, кинопробалар, асыҡ балалар телестудияһы, йырсы Ваня Дмитриенко һәм күренекле блогер Милана Хаметованың сығышы көтә. Шулай уҡ “Тыныс йоҡо, кескәйҙәр!” телетапшырыуының алып барыусылары менән осрашыу, мультпарад, “Союзмультфильм” геройҙары ҡатнашлығында байрам флешмобы көтөлә. “Балалар һайлауы” биләмәһенең тест-драйв майҙансығында “Башҡортостан буйлап” өҫтәл уйыны барыһының да иғтибарын йәлеп итте. Был уйынды “Башҡортостандың йәш таланттары” селтәренең ижади коллективы уйлап сығарған. “Был уйын балаларҙа Тыуған илгә ҡарата ҡыҙыҡһыныу һәм республикабыҙға ҡарата һөйөү тәрбиәләй. Ул Башҡортостандың картаһы рәүешендә төшөрөлгән һәм халҡыбыҙҙың милли геройҙары, тарихи ҡомартҡылары менән уйнала. Уйын балаларға ғына түгел, ололарға ла тәғәйенләнгән. Шуға ла ҡатмарлы ғына - башҡорт фольклорына, тарихына ҡағылған урындары ла күп. Уны беҙҙең селтәрҙең бөтә магазиндарында ла алырға була,” – тине “Йәш таланттар” селтәренең бүлек етәксеһе Виктория Грицук. Фестивалде рәсми асыу тантанаһында ҡунаҡтарҙы республика Башлығы Радий Хәбиров сәләмләне. “Был майҙанда беҙҙең тағы бер мәртәбәле сара уҙа. Һәм, әлбиттә, иң тәүҙә мин балаларҙы сәләмләйем. Был байрам тәү сиратта улар өсөн. Һәм фестиваль - бик етди сара, сөнки беҙҙең балаларыбыҙ нимә уйната, нисек үҫешә – был бик мөһим. Шуға ла беҙҙең уйынсыҡтар сифатлы, аңлайышлы һәм, әлбиттә, ҡыҙыҡлы булырға тейеш. Ә бөгөнгө сарала иһә һәр кем үҙенә кәрәккәнде, күңеленә яҡынды таба алыр тип ышанам, әйҙәгеҙ бергәләп уйнарға!” - тине ул. Башҡортостандың атҡаҙанған артисы Радик Юлъяҡшин: “Был фестивалдең тағы ла ҙурыраҡ кимәлгә сығыуын теләйем. Йәш быуын беҙҙең бала саҡ йәнһүрәттәре персонаждарын, уйынсыҡтарҙы күрһендәр һәм үҙҙәре лә уйнап ҡарап, беҙ кисергәнде кисереп, беҙҙең рухта үҫһендәр ине”, - тине. Был мәртәбәле сара Башҡортостандың Милли музейы ойошторған “Уйынсыҡтар тарихы” күргәҙмәһенән башланды. Унда бик боронғонан башлап хәҙерге көндәргә тиклемге уйынсыҡтар күрһәтелде. Айрат Нурмөхәмәтов фотолары.