Бөгөн Өфөләге “Рәсәй” медиаүҙәгендә “ГеоВызов” I Халыҡ-ара чемпионатына әҙерлеккә арналған матбуғат конференцияһы уҙғарылды. Чемпионат республикабыҙ баш ҡалаһында 16 – 22 сентябрҙә уҙғарыласаҡ. Үткән йыл көҙ Башҡортостан Башлығы Радий Хәбиров менән Ер аҫтын файҙаланыу буйынса федераль агентлыҡ етәксеһе Евгений Петров студентар, ғалимдәр һәм һөнәри геологтар осраша аласаҡ майҙансыҡ булдырыу тураһында килешкәйне. Чемпионатты уҙғарыу идеяһы ла ошолай тыуҙы. Сарала Рәсәйҙең һәм БДБ илдәре йәштәренең геологик хәрәкәте вәкилдәре ҡатнашасаҡ, ә “Роснедра” һәм уның ойошмаларының белгестәре, ер аҫтын файҙаланыусы компаниялар, ошо тармаҡтағы уҡыу йорттары һәм ғилми институттар эксперттар булып сығыш яһаясаҡ. Чемпионатта Рәсәйҙең 13 төбәгенән 18 команда, бынан тыш Ҡаҙағстандан бер команда ҡатнашырға теләк белдергән. Ярыш программаһы 11 этаптан торасаҡ. Матбуғат конференцияһында республика Хөкүмәте Премьер-министры урынбаҫары, Аппарат етәксеһе Азамат Абдрахманов, мәғариф министры Айбулат Хажин, экология һәм тәбиғәттән файҙаланыу министры Нияз Фазылов, Өфө фән һәм технологиялар университеты ректоры Вадим Захаров, Өфө дәүләт нефть техник университеты проректоры Александр Могучев һәм Рәсәй Фәндәр академияһы Өфө ғилми үҙәгенең геология институты директоры Сергей Ковалев чемпионатҡа әҙерлек, уның үҙенсәлектәре һәм маҡсаттары, йәштәрҙең һөнәри кимәлен күтәреүгә ниндәй йоғонто яһаясағын фаразлау тураһында һөйләне, журналистарҙың һорауҙарына яуап бирҙе. Чемпионат 22 сентябрҙә “Патриот” паркында тамамланасаҡ. Автор фотоһы.