Элекке көн Бөрө районында булған ҡурҡыныс юл фажиғәһе хаҡында яҙғайныҡ инде. Унда Кiа Riо һәм Nissan X-Trail еңел автомобилдәре бәрелешкәйне. Әле һәләкәт тураһында күберәк мәғлүмәт билдәле булды. Кiа Riо рулендәге 22 йәшлек егет алдағы транспортты ҡыуып уҙмаҡсы була, ләкин быны эшләрлек арауыҡтың етерлек булыуын самалай алмай. Һөҙөмтәлә ҙур тиҙлектә Nissan X-Trail машинаһы менән төкөшә. Ике машина ла юлдан ситкә сығып оса. Пассажир урынындағы 18 йәшлек ҡыҙ шунда уҡ вафат була, ә рулдәге егете - дауаханаға алып барып еткергәс. Икенсе автомобилдәге пассажир ҙа йәрәхәттәр ала. КП-Өфө яҙыуынса, һәләк булған егет менән ҡыҙ дуҫлашып йөрөгән. Радим - Балтас районынан, ә Рузанна Яңауылдан булған. Улар өйләнешергә лә йыйынған. - Бер-береһен ярата инеләр, өйләнешергә хыялландылар. Бына яҙмыштары нисек булды, - тип уфтана таныштары Лилиә. Бына бит фажиғә ниндәй матур, өмөтлө парҙың ғүмерен ҡыйған. Ә сәбәбе - йәш егеттең хәүефһеҙлек сараларын инҡар итеп, үҙ көсөн самаламай уйламаған хәрәкәт яһауы. Юлдарҙа хәрәкәт көслө, һаҡ булырға, юл ҡағиҙәләрен теүәл үтәргә кәрәк. Фото: БР ЮХХДИ/социаль селтәр/КП-Өфө.