“Иртә йәштәге осор кешенең үҫешендә айырыуса мөһим әһәмиәткә эйә. Был мәлдә баланың аңына фундаменталь һәләттәр һалына, танып белеү әүҙемлеге көсәйә, ижади һәләттәр асыла башлай, уның үҙ-үҙенә һәм башҡаларға ҡарата ышаныс тойғоһо барлыҡҡа килә. Шуға ла тап ошо осорҙа педагогтар менән ата-әсәнең уртаҡ маҡсатта бергә эшләүе кәрәк”, – ти Сибай ҡалаһындағы “Ҡурай” балалар баҡсаһының өлкән тәрбиәсеһе Нурия Вәлиева. Ул Башҡорт дәүләт университетының Сибай институтындағы мәктәпкәсә йәштәге балаларҙың педагогика һәм психолия факультетын тамамлаған. Инде 17 йыл балалар тәрбиәләү эшендә. “Ҡурай”ҙың өлкән тәрбиәсеһе яратҡан һөнәрен бөтөн күңелен һалып башҡара. Даими камиллашыу маҡсатында төрлө конкурстарҙа, ижади бәйгеләрҙә йыш ҡатнашып, уңышҡа өлгәшә. Мәҫәлән, 2018 йылда Сибай ҡалаһында үткән конкурста “Иң яҡшы тәрбиәсе” тип танылып, республика кимәленә үткән һәм лауреат булған. "Милләтебеҙҙең рухиәт ҡалҡаны булған ҡурай кеүек, "Ҡурай" балалар баҡсаһы - беҙҙең йәш быуын күңелендә милли рух, туған телебеҙгә, мәҙәниәтебеҙгә һөйөү уятыусы тәрбиә усағы. Изге бурыстарыбыҙҙы бар яҡлап лайыҡлы үтәргә тырышабыҙ. Атай-әсәйҙәр менән уртаҡ маҡсатта бергәләп эшләү - уңыштарыбыҙҙың төп нигеҙе", - ти Нурия Зиннур ҡыҙы. "Башҡортостан" гәзитенең "Бәйләнештә"ге төркөмөндә конкурсанттарыбыҙ өсөн тауыш бирергә саҡырабыҙ. Фотолар Н. Вәлиеваның шәхси архивынан алынды.