Радий Хәбиров XXVII “Бөтә Рәсәй” хәҙерге журналистика форумында ҡатнашты

Бөгөн Башҡортостан Башлығы Радий Хәбиров Сочиҙа XXVII “Бөтә Рәсәй” хәҙерге журналистика форумында ҡатнашты. Республика етәксеһе – ошо медиафорум тарихында уның сараһына килгән беренсе губернатор. Радий Хәбиров Рәсәй Журналистар союзы рәйесе Владимир Соловьев менән бергә Башҡортостандың махсус хәрби операцияға арналған экспозицияларын ҡараны. “Башҡортостан өсөн Ватанды һаҡлау – айырым тарих. Республика Рәсәй составына ингән ХVI быуаттан алып беҙҙең яугирҙәр хәрби бурыстарҙы үтәгән. Улар 1812 йылғы Ватан һуғышында, Бөйөк Ватан һуғышында ҡатнашҡан. Моғайын, махсус хәрби операцияла сағылыш тапҡан генетик хәтер ҙә барҙыр”, – тине Радий Хәбиров. Фоурм барышында республика Башлығы Рәсәй журналистары менән осрашты. Дискуссияның темаһы – “Башҡортостан махсус хәрби операцияла: “Үҙебеҙҙекеләрҙе ташламайбыҙ”. Осрашыуҙың модераторы булып Владимир Соловьев сығыш яһаны. Үҙ сығышында Радий Хәбиров журналистарға хәҙерге тарихты яҡтыртыуҙа объектив булғандары өсөн рәхмәт белдерҙе. “Хеҙмәтегеҙ өсөн ҙур рәхмәт һеҙгә! Илебеҙ өсөн ябай булмаған осорҙа киң мәғлүмәт сараларының роле иҫ киткес ҙур. Донбасстағы һуғыш хәрәкәттәрен беҙ махсус хәрби операция тип атаһаҡ, мәғлүмәт яланында ла ысын һуғыш бара. Башҡортостанда, башҡа күп төбәктәрҙәге кеүек үк, хәрби хәбәрселәр бар. Улар алғы һыҙыҡта эшләй. Был үтә лә мөһим. Башҡортостанда 146 дәүләт киң мәғлүмәт сараһы бар, улар берҙәм мәғлүмәт сәйәсәте алып бара”, – тине Радий Хәбиров. Осрашыу барышында республика етәксеһе журналистарҙың һорауҙарына яуап бирҙе. Саранан һуң Радий Хәбиров махсус хәрби операцияны һәм төбәк кешеләренең унда ҡатнашыуын яҡтыртҡан журналистарға республика наградалары тапшырҙы. Фото: Башҡортостан Башлығы сайты.